Saudiya Arabistoni podshohining akasi vafot etdi

Saudiya Arabistoni podshohi Salmonning akasi shahzoda Bandar bin Abdul Aziz Ol Saud 95 yoshida vafot etdi. Bu haqda SPA agentligi xabar tarqatmoqda.

Saudiya Arabistoni podshohlik xonadoni ma'lumotiga ko‘ra, bugun Makkadagi «Masjidul harom» masjidida janoza marosimi o‘tkazilgan.

1923 yilda tug‘ilgan shahzoda Bandar bin Abdul Aziz Ol Saud o‘z ixtiyori bilan qirollikda hech qanday rasmiy lavozim egallamagan. U Ar-Riyod provinsiyasi gubernatori Feysal bin Bandar bin Abdul Aziz va podshohlik milliy gvardiyasi rahbari Abdulla bin Bandar bin Abdul Azizning otasi edi.

Mahalliy nashrlarda so‘nggi yillarda bir necha marta Bandar bin Abdul Aziz Ol Saud og‘ir xasta ekani haqida xabarlar tarqalgandi.