Qirg‘izistonning sobiq prezidenti Almazbek Atamboyev atrofidagi vaziyatni qonun doirasida hal qilish lozim, dedi Qirg‘iziston prezidenti Sooronbay Jeenbekov Chuy oblasti aholisi bilan uchrashuv chog‘ida.
"Qonun oldida hamma teng, biz qonunga bo‘ysunishga majburmiz. Mamlakat shundagina rivojlanadi. Atamboyev ishi ham Qirg‘iziston qonunchiligi doirasida hal etilishi shart", - dedi u.
Jeenbekovning so‘zlariga ko‘ra, u hech qachon bir shaxs yoki ma'lum bir shaxslar guruhi manfaatlarini himoya qilishga va "o‘g‘irliklarini yashirishga" va'da bermagan.
"Men xalq prezidenti bo‘lishga va'da berganman. Maqsadim, prezidentlik faoliyatini yakunlaganimdan so‘ng sof vijdon bilan xalq ichida bo‘lish. Odamlar yodida yaxshi ishlarim bilan qolishni istayman. Men uchun xalqim, davlatim manfaatlari qimmatli. Atamboyev bilan bo‘layotgan voqealar, jumladan, uning guvoh sifatida tergovga chaqirilishi qonuniy holat. Huquqiy davlatda qonunchilik doirasida harakat qilinadi", - deb ta'kidladi u.
Atamboyev jinoiy avtoritet Aziz Batukayevning noqonuniy ozod qilinishi doirasidagi jinoiy ish bo‘yicha guvohlik berish uchun uch marta IIV tergov boshqarmasiga chaqirtirildi. Ammo sobiq prezident tergovga bormadi.
