"Inson o‘z baxti uchun masofadan qo‘rqmasligi lozim”. Xitoylik qiz Sirdaryoga kelin bo‘ldi

Kun.uz saytiga maktub yo‘llagan navbatdagi muxlisimizning yozganlari ko‘pchilik uchun qiziq tuyulishi tabiiy. Ilhomjon Kenjyebayev akasi o‘z baxtini uzoq Xitoy davlatidan topgani haqida maktub yo‘llaganidan so‘ng Chin yurtiga kuyov bo‘lgan Murodjon bilan bog‘landik.

– Murodjon, taqdiringiz Chin davlatiga bog‘lanish tarixini so‘zlab bersangiz?

– Biz Guliston shahridagi Ulug‘obod mahallasida yashaymiz. Xitoyga borib o‘qish menga bolalikdan orzu edi. Sababi, Xitoy juda ulkan, dunyoda yetakchi davlatlardan biri, men oddiy ishchi oilasida tavvalud topganman, otam ertalabdan kechgacha ishda bo‘lar, onam esa uy bekasi edi. Yoshlikdan kitob o‘qishni juda yoqtirardim. Menga Muhammad Alining “Men ko‘rgan Amerika” asari juda yoqqandi. 17 yoshimda Rossiyaga borib ishlashga qaror qildim, u yerda salkam 3 yil yurib yaxshi-yomonni tanidim. Keyin jamg‘argan mablag‘imga Xitoyda o‘qishga qaror qildim va Guanchjou shahriga keldim. Guangdong University Of Foreign Studies OTMda 2014 yildan 2016 yozigacha xitoy tili bo‘yicha o‘qidim.

Xitoyda o‘qishga kirish uchun avvalambor jiddiy imtihon topshirish kerak edi. Xitoy tili juda murakkab, keyinchalik aniq bir sohani tanlash kerak edi. 2016 yili Xitoy hukumatining stipendiya taqdim etiluvchi tanlovida qatnashib, arab tili yo‘nalishi bo‘yicha g‘olib bo‘ldim. Rostini aytsam, bu juda qiyin kechdi, xitoylik talabalar bilan birgalikda xitoy tili orqali arab tili o‘qishni boshladim. Fakultetimiz faqat til o‘rganish bilan bog‘liq va men arab tilini xitoyliklar bilan birga o‘rgangan birinchi chet ellik bo‘ldim.

Darsdan bo‘sh vaqtlarimda sport bilan shug‘ullanishni xush ko‘rardim. Bo‘lajak turmush o‘rtog‘im Li Ting (李婷) bilan ham 2015 yilda sport zalida tanishganmiz. O‘shanda u birinchi kurs talabasi edi. Ko‘p tanishlarim ayoling uyg‘urmi, deb so‘rashadi. Yo‘q, u Xitoyning xanzu millatiga mansub. Xanzular yoki xanlar bu davlatning asosiy millati hisoblanadi. Shu davragacha bir-birimizni sinadik. Insonni qiyinchiliklarda bilib olsa bo‘ladi. Talabalik hayoti oson emas, o‘qish uchun uydagilarga og‘irligimiz tushmasin deb, u bilan birga tarjimonlik qilganmiz, ish qidirganmiz. Vaqt o‘tishi bilan bir-birimizga juda yaqin bo‘lib qoldik. Mana, taqdirimiz qo‘shilgan ekan, shu yilning 1 avgust kuni to‘yimiz bo‘lib o‘tdi. Hozir hammamiz xursandmiz.

– Ota-onangiz Xitoydan kelin olib kelishga qarshilik qilishmadimi? Harqalay juda uzoq davlat, boshqa din, boshqa madaniyat...

– Har bir ota-ona o‘z farzandining boshini qovushtirishda ming martalab o‘ylanadi. Dadam rozilik berganlaridan keyin ham onam ko‘nmayroq turdi. Birgalikda bu rozilikni uch yil kutdik. Men Li Tingni o‘zim bilan birga olib kelib tanishtirdim, sharoitimizni boricha ko‘rsatdim. U barcha shartlarini tushungan holda dinimizni qabul qildi. Shundan keyin har ikki tomonning roziligi bilan to‘y bo‘lib o‘tdi. Endi, uzoqligiga kelsak, hozir dunyoning istalgan chekkasiga yetib borish imkoniyati bor. Fikrimcha, inson o‘z baxti uchun masofadan qo‘rqmasligi lozim.

– To‘yga Xitoydan ham mehmonlar kelishdimi?

– Albatta. 12 nafar mehmonni ota-onam o‘zbekona an'analarimizga muvofiq kutib olishdi, rosa mehmondorchilik qilishdi. Yurtimizni aylantirdik. O‘ylaymanki, mamnun bo‘lishdi.

– Kelinning sharoitimizga ko‘nikishi qiyin kechmasmikan?

– Yuqorida aytganimday, men hamma narsani boricha ko‘rsatganman. Inson bir-biriga suyansa, qiyinchiliklarni yengib o‘tadi, deb o‘ylayman. Qolaversa, O‘zbekiston ham kun sayin rivojlanayotgan davlat, ko‘pchilikdan qolishadigan joyimiz yo‘q. Sog‘inch qiynashi mumkin albatta, lekin borib-kelib turamiz.

– Rejalar qanaqa, ishqilib kelin sizni Xitoyga olib ketib qolmaydimi?

– Aksincha, men yaxshi mutaxassis bo‘lib yurtimga xizmat qilishni niyat qilganman va ayolim buni yaxshi biladi. Yaqinda men yana o‘qishga ketishim kerak, Li Ting o‘qishni tugatgan, u O‘zbekistonda qoladi va rejamiz bo‘yicha shu yerda ishlaydi. U o‘z ona tilidan tashqari ingliz tili bo‘yicha ham mutaxassis. Maktablardan birida bolalarga xitoy tilidan dars berishni niyat qilib turibdi.

 – Sizlarga saytimiz nomidan oilaviy baxt tilaymiz.

– Rahmat.

Eslatib o‘tamiz, bundan oldin OAVda Xorazmga kelin bo‘lib tushgan yaponiyalik hamda farg‘onalik yigit bilan taqdirini bog‘lagan angliyalik qizlar haqida ma'lumotlar berilgandi.

Abror Zohidov suhbatlashdi.