Energetika vazirligi elektr energiyasi uchun to‘lovlarni hisoblashning eng adolatli mexanizmi qaysi ekanligini ma'lum qildi

Elektr energiyasining iste'mol hajmidan kelib chiqib narxlarni differensiyalash elektr energiyasi uchun to‘lovlarni hisoblashning eng adolatli mexanizmi sifatida ko‘rilmoqda, deb ma'lum qildi O‘zbekiston energetika vaziri o‘rinbosari Sherzod Xo‘jayev.

«Biz shunga yetib kelmoqdamiz. Bizda aholi uchun differensial tarif bo‘ladi va u uchta ko‘rsatkich: bazaviy, pasaytirilgan va oshirilgan tariflardan iborat bo‘ladi. Mana shu holatda hammasi adolatli bo‘ladi», – dedi u.

Uning so‘zlariga ko‘ra, Energetika vazirligi ushbu variantni yuridik shaxslarda muvaffaqiyatli sinovdan o‘tkazdi. 

«Kechqurun zavodlar uchun tariflar kunduzgiga nisbatan bir yarim baravar past bo‘ladi. Amaliyotning ko‘rsatishicha, tariflarni differensiyalash qo‘shilgan qiymat iste'mol qilingan energiya hajmiga bevosita bog‘liq bo‘lgan energiyani tejovchi iste'molchilarga katta yordam berdi. Ular tejashni boshlashdi va elektr energiyasi uchun o‘rtacha tarif ancha past chiqa boshladi. Aholi uchun ham xuddi shunday qilishimiz mumkin», – qayd etdi vazir o‘rinbosari.

Uning qo‘shimcha qilishicha, narxlarni iste'mol hajmi bo‘yicha differensiyalash jahon amaliyotida qo‘llaniladi, ammo ijtimoiy me'yor haqida gap ketganda, «u haqda na aholi, na ayrim ekspertlar tushunchaga ega».

«Mening tushuncham bo‘yicha ijtimoiy me'yor bu – iste'molchilarning ma'lum bir toifasiga chegirma berishimiz kerak degani. Ular bir kilovatt uchun 295 so‘mdan to‘lamasliklari kerak (15 avgustdan yangi tariflar bo‘yicha – tahr.), ular shartli ravishda 200 so‘mdan to‘lashlari lozim. Ular himoyaga muhtoj, ammo 95 so‘mni budjetdan qoplashga unitar korxonaning (hududiy elektr tarmoqlari) qurbi yetmaydiganlardir. Demak, biz ko‘p iste'mol qilayotganlarga ustama joriy etishimiz lozim», – dedi Xo‘jayev.

Narxlarni aholi uchun differensiyalash hisob-kitoblarni olib borishda qiyinchilik tug‘dirishiga qaramasdan, bu «iste'molchiga nisbatan eng adolatli mexanizm bo‘ladi», deb ta'kidladi u.