Peskov Putinning ma'lumotlari o‘zgartirilganining ehtimoliy sababini ma'lum qildi 

Rossiya prezidenti matbuot kotibi Dmitriy Peskov Rosreyestrdan olingan ko‘chirmada Vladimir Putinning ismi va familiyasi nima uchun o‘zgartirilganini bilmasligini aytdi. 

Bir necha kun avval “Sobesednik” nashri Putinning ko‘chmas mulki haqida Rosreyestrdan olingan ko‘chirmada uning familiyasi va ismi Igor Petrovich Sergeyev-Gradskiyga o‘zgartirilgani haqidagi maqolni chop etgan.

Peskovning fikricha, bu davlat rahbarining xavfsizligi manfaatida qilingan bo‘lishi mumkin.

“Biror narsa ayta olmayman, chunki bu haqida ma'lumotga ega emasman”, deb aytgan Peskov jurnalistlarga.

Shu bilan birga Peskov “bu Putin davlat tomonidan qo‘riqlanuvchi obekt, mamlakatdagi eng qo‘riqlanuvchi kishi hisoblanishi va ehtimol xavfsizlikni ta'minlash qoidalari bilan bog‘liq bo‘lishi mumkinligi” aytgan.