O‘zbekistonda amaldorlar faoliyatini baholash mezonlari taklif qilindi

Normativ-huquqiy hujjatlar loyihalari muhokamasi portalida O‘zbekiston Prezidentining "Davlat organlarida zamonaviy boshqaruv usullarini joriy etish bo‘yicha birinchi navbatdagi chora-tadbirlar to‘g‘risida"gi qarori loyihasi e'lon qilindi.

Hujjat loyihasiga muvofiq, davlat organlarida davlat xizmatchilarining ish faoliyatini quyidagi samaradorlikning asosiy ko‘rsatkichlari (SAK) asosida baholashni bosqichma-bosqich joriy qilish rejalashtirilmoqda:

- davlat xizmatchisining davlat strategik maqsadlari va vazifalariga erishishdagi rolini belgilaydigan, davlat strategik dasturlarini amalga oshirishning samaradorlik ko‘rsatkichlari bilan bog‘liq bo‘lgan umumiy ko‘rsatkichlar;

- davlat organining strategik maqsad va vazifalariga erishish bilan bog‘liq bo‘lgan tegishli sohani rivojlantirishning ustuvor vazifalarini hal qilishda davlat xizmatchisining rolini belgilovchi tarmoq ko‘rsatkichlari;

- davlat xizmatchisining davlat organi faoliyatidagi rolini va / yoki amalini rivojlantirishdagi shaxsiy va kasbiy yutuqlarini belgilaydigan, xizmatchilarning o‘zlari rahbarlar bilan birgalikda tuzilgan va xodimning keyingi hisobot davridagi ish rejasida aks ettirilgan mansab ko‘rsatkichlari.

Dastlabki bosqichda davlat xizmatchilarining SAKka asoslangan faoliyatini baholash amaliyoti 2020 yil 1 yanvardan boshlab Iqtisodiyot va sanoat vazirligi, Uy-joy kommunal xo‘jaligi vazirligi, Investitsiyalar va tashqi savdo vazirligi, Turizm bo‘yicha davlat qo‘mitasi hamda Jizzax va Toshkent viloyatlari hokimliklarida tajriba sifatida joriy etiladi. .

Qaror loyihasida ko‘rsatilishicha, SAK quyidagi prinsiplarga asoslanadi:

- SAkni joriy etishda ish beruvchi, xodim va kasaba uyushmasi o‘rtasidagi hamkorlik;

- tashkilotning asosiy faoliyatidan kelib chiqib SAKni aniqlash;

- ko‘rsatkichlarni baholash, hisobot va samaradorlikni oshirish jarayonlari integratsiyasi;

- ishlab chiqarish ko‘rsatkichlarini strategiya bilan muvofiqlashtirish.

Shuningdek, davlat xizmatchisining ish haqiga ustama miqdori bajarilgan ishlarning hajmi, ularning samaradorligi, sifati va murakkabligini hisobga olgan holda SAKka erishish yoki erishmaslik natijalariga qarab belgilanadi.

Davlat organlarida davlat xizmatchilarining samaradorligi faoliyatini SAK asosida baholashni bosqichma-bosqich joriy etish uchun maxsus ishchi komissiya tuziladi.

Eslatib o‘tamiz, hujjat loyihasi o‘zgartirilishi, to‘ldirilishi yoki rad etilishi mumkin. Hujjatning to‘liq matni bilan bu yerda tanishish mumkin.