Pedofiliyada ayblangan xorazmlik sobiq amaldorlar ishi bo‘yicha sud jarayoni davom etmoqda

Bugun ijtimoiy tarmoqlarda oilaviy mehribonlik uyida jinsiy tajovuzga uchragan tarbiyalanuvchilar ishi bo‘yicha davlat mulozimlariga nisbatan sud hukmi o‘zgarishsiz qolgani haqida xabarlar tarqaldi.

Kun.uz holat yuzasidan Oliy sud matbuot kotibi Aziz Obidovdan izoh so‘radi. Uning ta’kidlashicha, ish bo‘yicha sud jarayoni davom etmoqda.

“Toshkent shahar sudining jinoyat ishlari bo‘yicha sudlov hay’ati apellyatsiya instansiyasida ushbu jinoyat ishi ko‘rib chiqilmoqda. Sud jarayoni davom etyapti va hali qaror qabul qilinmagan. 

Sudlar to‘g‘risidagi qonunning 66-moddasiga ko‘ra, ommaviy axborot vositalari o‘z xabarlarida muayyan ish yuzasidan sud muhokamasi natijalarini oldindan o‘zicha hal qilib qo‘yishga haqli emas”, deya ma’lum qildi Oliy sud matbuot kotibi.

Eslatib o‘tamiz, Xorazmdagi oilaviy bolalar uyi tarbiyalanuvchilariga nisbatan sodir etilgan jirkanch jinoyat ishi bo‘yicha birinchi instansiya sudining hukmi 2022 yil sentabrda qabul qilingan. O‘tgan yil dekabr oyiga kelib ish Xorazm viloyati sudida apellyatsiya tartibida qayta ko‘rilgan. Viloyat sudi hukmni o‘zgarishsiz qoldirgan.

Bosh prokuratura sud hukmi va apellyatsiya instansiyasi ajrimlari qonuniyligini o‘rganib chiqib, sudlanuvchilarga yengil jazo tayinlangan, degan xulosaga kelgandi.

Joriy yil 6 aprel kuni ish Oliy sudda ko‘rib chiqilib, hukmning Oybek Masharipov va Anvar Quryazovga oid qismi bekor qilingan hamda apellyatsiya instansiyasida qayta ko‘rib chiqish uchun Toshkent shahar sudiga yuborilgandi.

Toshkent shahar sudi apellyatsiya instansiyasi esa Xorazm viloyat Adliya boshqarmasi sobiq boshlig‘i Oybek Masharipov va tuman favqulodda vaziyatlar bo‘limi sobiq boshlig‘i Anvar Quryazovga yangi ayblov bo‘yicha jinoyat ishi qo‘zg‘atish va boshqa shaxslarni jinoiy javobgarlikka tortish masalasini hal qilish uchun ishni prokurorga yuborgandi.