O‘zbekistonni 2030 yilgacha kompleks rivojlantirishda BAA tajribasidan foydalaniladi

Joriy yilning 24–28 mart kunlari O‘zbekiston Respublikasi prezidenti Shavkat Mirziyoyev Birlashgan Arab Amirliklariga rasmiy tashrif buyurishi ushbu davlat bilan turli sohalarda yangi hamkorlik yo‘nalishlarini boshlab berdi.

Tashrifning mantiqiy davomi sifatida Prezident tomonidan BAA bilan ustuvor yo‘nalishlarni amalga oshirish uchun «Yo‘l xaritasi» ham tasdiqlandi.

Bugun esa mamlakat o‘zining o‘rta va uzoq muddatli rivojlanish strategiyasini ishlab chiqishda amirliklar tajribasini ham o‘rganmoqda.

Aynan shuning uchun Iqtisodiyot va sanoat vazirligida «O‘zbekiston Respublikasini 2030 yilgacha ijtimoiy-iqtisodiy kompleks rivojlantirish konsepsiyasi» doirasida o‘tkazilgan davra suhbatida BAAning taraqqiyot dasturi bo‘yicha vakili Hessa G‘affariy tomonidan taqdimot o‘tkazildi.

«Birlashgan Arab Amirliklari 2021 yilgacha dunyoning eng yaxshi mamlakatlari qatorida bo‘lishni maqsad qilgan. Buning uchun ishlab chiqilgan taraqqiyot dasturi orqali davlat barqaror atrof-muhit va yaxshi ta'minlangan jamiyatda yuqori yashash standartlariga erishishni maqsad qilgan», deya ta'kidladi G‘affariy xonim.

Bu borada BAA davlatda turli islohotlarni amalga oshirishga harakat qilmoqda. Masalan, aholi bilimini oshirish borasida qilinadigan islohotlar va innovatsiyalar iqtisodiyotning samaradorligiga ta'sir ko‘rsatishi ko‘zda tutilgan.

Yoki barqaror atrof-muhit orqali hayot sifatini yaxshilashi kerakligi maqsad qilib olingan. Bu borada fuqarolarning barchasi boshlang‘ich ta'lim olishiga imkon yaratish, sog‘liqni saqlash sohasini jahon talablari darajasiga mos holatga keltirish lozim.

Adolatli sudlov tizimida aholi xavfsizligi ta'minlanadi

BAA o‘z fuqarolarini nafaqat ichki va har qanday tashqi tahdiddan ham himoya qiladi. Bu borada jamiyatda ijtimoiy tenglikni ta'minlash va o‘sish xavfi bor tashqi xavflardan himoyalanishga alohida e'tibor qaratilmoqda.

Adolatli sudlov borasida esa mamlakat uning xavfsizlikni kuchaytiruvchi funksiyasiga ishonadi va hamisha hammaning odil sudlovga ishonishi va undan foyda olishi mumkin bo‘lishi darajasida harakat qiladi. Bu borada quyidagilarga erishish zarur:

·       Xavfsizlik hissi;

·       Sudlov tizimi samaradorligi;

·       Yo‘l-transport hodisalari natijasida sodir bo‘ladigan o‘lim sonining har ming kishi kishiga hisobiga kamayishi;

·       Xavfsizlik tizimiga ishonch;

Ijtimoiy va iqtisodiy o‘sishda tenglik bo‘lishi zarur

BAA barqaror taraqqiyotga erishish yo‘lida atrof-muhitni asragan holda ijtimioy va iqtisodiy tenglikka erishishni niyat qilgan. Shuning uchun havo tozaligi, suv resurslarini asrash, yashil zonalarni ko‘paytirish, toza energiya manbaalariga ega bo‘lish kabilarga diqqat qaratilmoqda.

Bundan tashqari, davlat dunyo bo‘yicha ayeroportlar, yo‘llar, yo‘l infrastrukturasi va elektr ta'minoti tizimida eng yaxshilardan bo‘lishga harakat qilyapti.

Bu borada turli ko‘rsatkichlarga to‘g‘ri kelish zarur hisoblanadi:

·       Havo sifati indeksi;

·       Havo yo‘llari transporti sifati indeksi;

·       Port strukturasi indeksi;

·       Logistik rivojlanish indeksi;

·       Suv tanqisligi indeksi;

·       Onlayn xizmatlar indeksi;

·       Telekommunikatsiya infrastrukturasi indeksi.

Hukumat sog‘liqni saqlash sohasi bilan hamkorlik qiladi

«BAA 2021 yilgacha mamlakatni insoniyat taraqqiyoti indeksi bo‘yicha yuqori nuqtaga ko‘tarmoqchi va fuqarolari Birlashgan Arab Amirligidan ekanligi bilan faxrlanib yurishini maqsad qilgan», deydi Hessa G‘affariy.

Bundan tashqari, davlat turli xalqaro tanlovlar va olimpiya o‘yinlaridagi medallari sonini ko‘paytirishga ham alohida urg‘u bermoqda.

G‘affariy xonimning ta'kidlashicha, BAA hukumat sog‘liqni saqlash sektori bilan doimiy hamkorlikda ishlab, davlat va xususiy kasalxonalardagi tibbiy xizmatni oshirish uchun harakat qilmoqda.

Bu borada har 100 ming aholi orasida kuzatiladigan yurak va saraton kasalliklarining sonini qisqartirish, aholi orasida qand kasalligining keng tarqalishiga yo‘l qo‘ymaslik, bolalarni semizlikdan asrash, tamaki mahsulotlari iste'moli ko‘payib ketmaslgini nazorat qilish kabilarni amalga oshirmoqda.

Islohotlar turli yo‘nalishlarni qamrab oladi

Davlatda milliy ta'limni isloh qilish, oliy ta'lim va yuqori malakaga

e'tibor qaratish, milliy investitsiya siyosati, sanoat va ishga olish siyosati, energitika siyosati, suv ta'minoti va kelajak oziq-ovqat xavfsizligi borasida turli reformalar dasturi ishlab chiqilgan.

Aytaylik, ta'lim sohasidagi islohotlar bilan yaqindan tanishsak, o‘qituvchilarning bilimi va kompetensiyasini oshirish va bu orqali o‘zgarishlarni kuchaytirish, talabalarning ishlashga tayyorlik xususisiyatini oshirish kabilar diqqat markaziga qo‘yilganini kuzatish mumkin.

O‘zbekiston ham o‘z taraqqiyot konsepsiyasida yuqoridagilarni o‘rganishi va ayrimlarini mamlakat sharoitiga moslashtirishi mumkin.

Zilola G‘AYBULLAYeVA,

Kun.uz muxbiri