Buzilishi mo‘ljallangan inshootlarni baholash bo‘yicha yangi tartib ishlab chiqiladi

Axborot va ommaviy kommunikatsiyalar agentligida 6 sentabr kuni Davlat aktivlarini boshqarish agentligi vakillari ishtirokida tadbir o‘tkazildi. Agentlik departament boshlig‘i Aziz Nagayev buzilishi mo‘ljallangan obektlarni baholashda yangi tartib joriy etilishi va bu bo‘yicha ishlab chiqilgan qaror loyihasi haqida axborot berdi.

«Qaror loyihasi muhokamalar portaliga qo‘yilgan. Bu bo‘yicha fuqarolar tomonidan 100tadan ortiq izohlar olindi va ularda 200ga yaqin takliflar bildirilgan. Bu sohadagi asosiy muammolardan biri shuki, aksariyat mulkdorlarda buzilishga tushgan turar va noturar joylarning huquqiy egalikni belgilovchi hujjatlari to‘liq rasmiylashtirilmagan bo‘ladi. Misol uchun, kadastr hujjatlarida ayrim mol-mulklar qayd etiladi, o‘zboshimchalik bilan qurilgan obektlar ko‘rsatilmaydi. Bunaqa holatlarda baholash obekti nima bo‘lishi kerakligi bo‘yicha savollar tug‘ilyapti. Keyingi hal qilinishi kerak bo‘lgan masala baholash bir necha instansiyalar tomonidan amalga oshiriladi. Oqibatda, turlicha baholash qiymati paydo bo‘ladi va shundan ham nizo kelib chiqyapti. Shunday tushunmovchiliklarni bartaraf qiladigan normalar qaror loyihasida o‘z aksini topadi», deya uning so‘zlarini keltirmoqda Kun.uz muxbiri.

Shuningdek, agentlikning departament boshlig‘i Jo‘rabek Ahmedovning ma'lumot berishicha, agentlik boshqarayotgan 418ta xo‘jalik jamiyatlari tomonidan 42,4 trln so‘m sof tushum olindi. Bu YaIMning 19,1 foizini tashkil etadi. Yil oxirigacha 600dan ortiq obektlarni sotish vazifasi qo‘yilgan va budjetga 220 mlrd so‘m pul tushumini ta'minlash rejalashtirilgan.