23:45 / 09.09.2019
10
18344

«Tut daraxtini g‘ayriqonuniy kesganlik, shikastlantirganlik yoki yo‘q qilganlik uchun javobgarlik kuchaytirilmoqda» – «O‘zbekipaksanoat»

O‘tgan 2018 yil davomida Respublikaning turli xududlarida 48 ming tupdan ortiq tut daraxti  o‘tin uchun yoki boshqa maqsadlarda kesib ketilgan. Bu haqda bugun, 9 sentabr kuni Axborot va ommaviy kommunikatsiyalar agentligi anjumanlar zalida Iqtisodiyot va sanoat vazirligi hamda «O‘zbekipaksanoat» uyushmasi mutasaddilari ishtirokida “Respublikada ipakchilik tarmog‘ini yanada rivojlantirish chora-tadbirlari to‘g‘risida”gi qarori ijrosi va mohiyati yuzasidan  o‘tkazilgan matbuot anjumanida ma'lum qilindi.

Tadbir davomida respublikaning turli hududlarida ipak qurtining asosiy ozuqasi bo‘lgan – tut daraxtini kesib ketish holatlari ko‘p uchrashi va bu borada «O‘zbekipaksanoat» tomonidan qanday ishlar amalga oshirilayotgani borasida savol bilan murojaat qilindi.

«Muammoni yashirishning hojati yo‘q, bu mavjud holat. Albatta, joylarda Ekologiya va atrof-muhitni muhofaza qilish qo‘mitasi xodimlari tomonidan nazorat tashkil qilinadi, lekin buni yetarli deb bo‘lmaydi.

2019 yil 31 iyulda O‘zbekiston Respublikasi Prezidentining «Pillachilik tarmog‘ida chuqur qayta ishlashni rivojlantirish bo‘yicha qo‘shimcha chora-tadbirlar to‘g‘risida»gi qarori e'lon qilindi. 

Mazkur qarorda Ekologiya va atrof-muhitni muhofaza qilish qo‘mitasi «O‘zbekipaksanoat» bilan birgalikda ikki oy muddatda tut daraxtlarini g‘ayriqonuniy kesganlik, shikastlantirganlik yoki yo‘q qilganlik uchun undirilgan jarimalarning ellik foizi o‘sha hududda yangi tutzorlarni barpo qilishga yo‘naltirish tartibini ishlab chiqish va Vazirlar Mahkamasiga kiritishi belgilangan. 

Mazkur qaror asosida endilikda tut daraxtlarini g‘ayriqonuniy kesganlik, shikastlantirganlik yoki yo‘q qilganlik uchun undirilgan jarimalar miqdori oshiriladi. 

Biz bundan tashqari tut daraxtini g‘ayriqonuniy kesishning salbiy oqibatlari haqida doimiy tushuntirishlar olib bormoqdamiz»,- deya «O‘zbekipaksanoat» uyushmasi Boshqarma boshlig‘i Xasan Komilovning so‘zlarini keltirmoqda Kun.uz muxbiri.

Ushbu xabarga fikringizni bildiring. Buning uchun avtorizatsiyadan oʻtishingiz kerak!
Top