Samarqandda Fransiya kompaniyasi bilan hamkorlikda 100 MVt quvvatga ega fotoelektr stansiyasi qurilishi boshlanadi

«O‘zbekiston Respublikasida davlat-xususiy sheriklik asosida fotoelektr stansiyasi qurilishiga Fransiyaning Total Eren kompaniyasi 150 mln yevrogacha investitsiya kiritmoqda», deb xabar berdi O‘zbekiston Investitsiyalar va tashqi savdo vazirligi matbuot xizmati.

Xabar qilinishicha, 13 sentabr kuni Investitsiyalar va tashqi savdo vaziri Sardor Umurzaqov va Total Eren kompaniyasi ijrochi vitse-prezidenti Faben Demol Samarqand viloyatida 100 MVtli fotoelektr stansiyasini qurish bo‘yicha investitsiya kelishuvini imzoladi. 

«Bu O‘zbekistonda alternativ energiya sohasidagi bunday miqyosdagi birinchi tijoriy loyihadir», deyiladi xabarda.

Total Eren elektr stansiyasini loyihalashtirish, moliyalashtirish, qurish va ekspluatatsiya qilish kabi barcha bosqichlarini amalga oshiradi. Qurilish ishlari 2020 yilning birinchi choragida boshlanishi va 2021 yilning birinchi choragida esa stansiya foydalanishga topshirilishi kutilmoqda.

Eslatib o‘tamiz, O‘zbekiston Prezidentining 2018 yil oktabr oyida Fransiyaga rasmiy tashrifi chog‘ida O‘zbekiston Hukumati va Total Eren o‘rtasidagi hamkorlik memorandumi imzolangandi.

Total Eren - qayta tiklanadigan energiya sohasida dunyodagi yetakchi kompaniyalardan biri hisoblanadi. Kompaniyaning amalga oshirilayotgan investitsiya loyihalari portfeliga qayta tiklanadigan energiya manbalaridan elektr energiyasini ishlab chiqarish uchun o‘rnatilgan 2400 MVt dan ortiq quvvat, shuningdek dunyoning turli burchaklarida 2000 MVt dan ortiq quvvatni ishga tushirish bo‘yicha loyihalar kiradi.