Tanzila Norboyeva: bloger va jurnalistlar ko‘targan muammolarni hal qilish tizimini ishlab chiqishimiz kerak 

14 sentabr kuni Senat binosida senatorlar va deputatlar ishtirokida qo‘shma yig‘ilish o‘tkazildi. Oliy Majlis Senati va Qonunchilik palatasi vakillari xolis axborot tarqatishda OAV xodimlarining o‘rni, etikasi, bilimi haqida fikr bildirishdi. Senat raisi Tanzila Norboyeva davlat organlari va OAV samarali faoliyat olib borishida yangi tashkil etilgan jamoatchilik kengashi ahamiyati haqida gapirdi.

“Jamoatchilik kengashi biz uchun yangi yo‘nalish. OAVda yoritilayotgan davlat idoralari xodimlari bilan bog‘liq bo‘layotgan noxush vaziyatlar ko‘paymasligi uchun davlat organlarini jurnalistlar bilan samarali ishlashga o‘rgatish kerak. Shu bilan bir qatorda, yosh jurnalistlar, blogerlarning malakasini oshirish, o‘qitish mexanizmini yaratishimiz lozim. Ular orqali ko‘tarilayotgan muammolarni hal qilib borish tizimini ham ishlab chiqishimiz zarur. Prezident xalq bilan muloqot qilib, muammolarni aniqlash, shunga qaratilgan chora-tadbirlarni manzilli ishlab chiqish kerakligini uch yildan beri doimiy ta'kidlab kelyapti. Lekin biz hali bunga yetib kelganimiz yo‘q. Birinchi ko‘makchilarimiz shu bloger va jurnalistlarimiz bo‘ladi. Bularning tajribasini qo‘llash mexanizmini takomillashtirish kerak, deb o‘ylayman. Yangi tashkil etilgan jamoatchilik kengashi mana shu vazifalarni amalga oshirishga e'tibor qaratadi”. 

Norboyevaga ko‘ra, hozirgi kunda OAV va davlat idoralari o‘rtasida ko‘prikning yo‘qligi axborotlarni olish va tarqatishda noxolisliklar bo‘lishiga olib kelyapti. Bunday vaziyatlarning oldini olish hamda davlat va xalq o‘rtasida sog‘lom axborot almashinuvini yuzaga keltirish uchun jamoatchilik kengashining ahamiyati nihoyatda katta.