Rossiya migrantlari federatsiyasi rahbari: O‘zbekistonda dabdabali to‘ylarga taqiqlov migrantlar oqimini kamaytiradi, deb o‘ylamayman

14 sentyabrda O‘zbekiston Respublikasi Oliy Majlisi Senatining yigirma ikkinchi yalpi yig‘ilishida respublikada to‘y va boshqa oilaviy tadbirlarning o‘tkazilishi masalasi ko‘rib chiqildi.

Dabdabali tadbirlarga barham berish maqsadida O‘zbekiston Respublikasi Oliy Majlisi Senati Kengashining qaroriga muvofiq Qoraqalpog‘iston Respublikasi Jo‘qorg‘i Kengesi, xalq deputatlari viloyat, tuman va shahar Kengashlarida, shuningdek fuqarolar yig‘inlarida oilaviy tadbirlar o‘tkazilishini tartibga solish masalalari bo‘yicha komissiyalar tuzildi, ko‘plab tushuntirish va targ‘ibot tadbirlari o‘tkazildi.

Biroq o‘rganishlar tahlili, shuningdek aholi bilan bevosita o‘tkazilgan muloqotlar, jamoatchilik vakillaridan kelib tushgan murojaatlar ushbu sohada bir qator jiddiy muammo va kamchiliklar hamon saqlanib qolayotganini ko‘rsatdi. Xususan, ayrim fuqarolar dabdabali to‘y marosimlari va ularni o‘tkazishga sarflanadigan katta xarajatlar oqibatida qarzga botmoqda va undan qutulish maqsadida chet elga ishlash uchun chiqib ketmoqda.

Ba'zi fuqarolar oilaviy tadbirlarni dabdaba bilan o‘tkazishni qo‘shnilar, qarindoshlar tomonidan bo‘ladigan tanqidlardan, umuman olganda, ijtimoiy tazyiqdan xalos bo‘lish vositasi sifatida tushunmoqda. Vaholanki, bunday tadbirlar yaqin qarindoshlar o‘rtasida qarzdorlikning vujudga kelishiga va oqibatda keskin ziddiyatlarga olib kelmoqda.

Shu munosabat bilan Oliy Majlis Senati Kengashi va Qonunchilik palatasi Kengashining “To‘ylar, oilaviy tantanalar, ma'raka va marosimlar o‘tkazilishini tartibga solish tizimini yanada takomillashtirish to‘g‘risida”gi qo‘shma qarori qabul qilindi.

Rossiya migrantlar federatsiyasi prezidenti Vadim Kojyenov “Politika Segodnya” nashri bilan suhbatda bunday choralar Tojikistonda 10 yildan ko‘proq vaqtdan beri amal qilishini aytgan.

“Bu choralar yaxshi, men ularni qo‘llab-quvvatlayman. Chunki bu sharqona o‘ziga xoslikdir – boshqalar oldida o‘zini ko‘z-ko‘z qilish – bu juda zararli illatdir. Boy bo‘lmagan odamlar boylardek to‘y qilishni istaydilar: kreditlar oladilar, qarzga botadilar, chorvani sotadilar. Chunki to‘y ularning hayotidagi muhim hodisadir. Natijada esa aholining nochor qatlamlari qarzga botadi”, deb aytgan Kojyenov.

Biroq u dabdabali tantanalarga taqiqlov Rossiyaga migrantlar oqimini kamaytiradi, deb o‘ylamasligini aytgan.

“Ketishga tayyorlar, qarzi bo‘lmasa ham ketadi. Ketishga tayyormaslar, qarzi bo‘lsa ham qoladi va hammasi yomonligidan nolib yuradi, ketmaydi”, deb ta'kidlab o‘tgan Kojyenov.

O‘zbekistonning Bandlik va mehnat munosabatlari vazirligi ma'lumotlariga ko‘ra,  2018 yilda O‘zbekiston fuqarolari vatanlariga 5 mlrd dollarga yaqin pul o‘tkazishgan. Bu qiymatdan katta qismi – 4 mlrd dollardan ko‘prog‘i Rossiyadan yuborilgan.  

Rossiya Markaziy bankining ma'lum qilishicha, 2019 yilning ilk 6 oyida Rossiyadan O‘zbekistonga pul o‘tkazmalari hajmi 2 mlrd dollardan oshgan.