Qirg‘iziston Rossiyadan pul jo‘natmalariga qo‘yilgan cheklov miqdorini oshirishni so‘radi

Qirg‘iziston Rossiyadan shaxsiy pul jo‘natmalariga qo‘yilgan cheklov miqdorini oshirishni so‘radi. Bu haqda Qirg‘izistonning Rossiyadagi elchisi Alikbek Jyekshenkulov ma'lum qildi.

"26 sentabr kuni Rossiya tashqi ishlar vazirligida bo‘lib, pul jo‘natmalarini cheklash to‘g‘risidagi masalani o‘rtaga tashladik", - dedi Jyekshenkulov.

Ma'lum qilinishicha, cheklovlar tufayli bu yil Rossiyadan Qirg‘izistonga pul jo‘natmalari hajmi kamaygan.

"Joriy yilning yetti oyi ichida Rossiyadan Qirg‘izistonga 1 milliard 324 million dollar o‘tkazilgan. O‘tgan yillarning shu vaqti davomida qariyb 2 milliard dollar o‘tkazilgan. Ekspertlarning fikricha, cheklovlar sababli shunday bo‘lgan", - deyiladi elchixona tomonidan.

Shu yilning aprelida Rossiya to‘lov tizimlari Rossiyadan Xitoy, Qirg‘iziston va Vetnamga pul jo‘natmalariga cheklov joriy etdi. Rossiya hukumati buni noqonuniy moliyaviy operatsiyalarga qarshi kurashish deb izohladi.

Cheklovga ko‘ra, bu mamlakatlarga bir marta yoki 30 kun davomida bo‘lib-bo‘lib 100 ming rubl pul jo‘natish mumkin.