Akmal Saidov: diniy masalalar bo‘yicha 52 tavsiyaning 51tasini bajardik

Bugun, 4 noyabr kuni O‘zbekiston Respublikasi prezidenti huzuridagi Davlat boshqaruvi akademiyasida «Qonun ustuvorligi va din» mavzusida xalqaro seminar ish boshladi. Tadbirda turli davlatlardan vakillar ishtirok etishdi.

Seminarning ochilish marosimida minbarga chiqqan O‘zbekiston Inson huquqlari milliy markazi rahbari Akmal Saidov BMT Inson huquqlari bo‘yicha kengashining din va e'tiqod erkinligi bo‘yicha maxsus ma'ruzachisi Ahmed Shahid tomonidan berilgan 52ta tavsiyaning 51tasi bajarilgani haqida ma'lum qildi.

«Assalomu alaykum va rahmatullohi va barokatuh.

Hozirgi kunda O‘zbekistonda 16 yo‘nalishda 2 mingdan ortiq diniy tashkilotlar faoliyat yurityapti. BMT Inson huquqlari bo‘yicha kengashining din va e'tiqod erkinligi bo‘yicha maxsus ma'ruzachisi Ahmed Shahid O‘zbekistonga tashrif buyurganida istagan joyga borishi, o‘z ko‘zlari bilan ko‘rishi uchun yetarlicha sharoit yaratib berdik. Hatto ko‘pchilik yomonlagan «Jasliq» koloniyasini ham shaxsan kirib ko‘rdi. Xabaringiz bor, prezident tashabbusi bilan bu qamoqxona hozir yopilgan.

Ahmed Shahid janoblari bizdagi holatni o‘rganib bergan 52 tavsiyasining 51tasini bajardik. Faqat bittasi qoldi. Bu ham bo‘lsa «Vijdon erkinligi va diniy tashkilotlar to‘g‘risida»gi Qonunning yangi tahriri. Ammo bu borada shoshib bo‘lmaydi, chunki bu qonun, xato qilishga haqqimiz yo‘q. Tavsiyalarni bajarganimizdan keyin Janob Shahidni yana chaqirdik. Vaqti bo‘lishi bilan kelib o‘z ko‘zi bilan ko‘rib ketadi» – deya Akmal Saidovning so‘zlarini keltirmoqda Kun.uz muxbiri.