«Ular munosib jazosini oladi» - Sherzod Kudbiyev oliy ta'limdagi korrupsiyaga qarshi kurash haqida

O‘zbekiston hukumati ta'lim sohasidagi korrupsiyaga qarshi qattiq kurash olib boradi. Bu haqda O‘zbekiston Prezidentining davlat xizmati va davlat hokimiyati vakillik organlari bilan hamkorlik qilish masalalari bo‘yicha maslahatchisi Sherzod Kudbiyev 5 noyabr kuni Toshkent davlat iqtisodiyot universiteti binosida oliy ta'lim tizimida korrursiyaga qarshi kurashishga bag‘ishlab o‘tkazilgan yig‘ilishda aytib o‘tdi.

«Oliy ta'lim muassasalari davlatimizda olib borilayotgan oshkora siyosatga yetarlicha munosabat hamda javob qaytara olmayaptilar.

Oliy ta'lim tizimida bugun keskin qadam qo‘ymas ekanmiz, hech qachon sohada o‘zgarish bo‘lmaydi!
 
Salbiy holatlarni Toshkent davlat iqtisodiyot universitetida ham ko‘rishimiz mumkin.

Afsuski, universitet rahbariyati hamda jamoasidan xalqimiz va Prezidentimiz kutayotgan natija bo‘lmayapti. Talabalar bilimini baholash, ularni kursdan kursga qoldirish, talabalar safidan chetlashtirish, o‘qishga tiklash va ko‘chirish jarayonlarida ochiqchasiga korrupsion holatlar hali hanuz davom etmoqda.

O‘qituvchilar tomonidan sun'iy ravishda talabalarning ballari pasaytirilishi, aytingchi, bunday oliyjanob kasb egasining talaba qo‘liga qarashi - pastkash va jirkanch holat emasmi?

Korrupsiyaga qarshi qattiq kurashamiz! Prezidentimiz aytganlaridek, orqaga yo‘l yo‘q, ko‘priklar yonib ketgan.

Rahbarlar yoki xalqqa xizmat qiladi, yoki ketadi. Ketganda ham oddiy qutulmaydi. Buni bugun prezidiumda o‘tirganlarni ko‘rib ham, xulosa qilsa bo‘ladi.

Xalqqa xizmat qilmaydigan, vazifasini suiiste'mol qiladigan, oyog‘i yerdan uzilgan rahbarlar bilan biz hech qachon ishlay olmaymiz, ishlamaymiz ham. Ular munosib jazosini ham oladi.

Bilib qo‘yinglar, butun oliy ta'lim tizimida o‘rganishlar davom etadi, ularning natijalari to‘g‘risida hali eshitasizlar, keskin choralar ko‘riladi!

Xuddiki yuqorida aytilgan salbiy holatlar menga tegishli emas, meni aytmadi-ku, degan rektorlar ham oramizda yo‘q emas.

Bilib qo‘yinglar, kimda kim shunday o‘ylasa, juda qattiq xato qiladi! Barcha ma'lumotlar yetarli! Yuridik universitet, Iqtisodiyot universiteti... Agar hali vaziyat o‘zgarmasa bu ro‘yxat yana davom etadi», deya prezident maslahatchisi so‘zlarini keltirgan Huquqshunos Xushnudbek Xudoyberdiyev telegramdagi kanalida.

Eslatib o‘tamiz, 5 noyabr kungi yig‘ilishda Bahodir Xodiyev TDIU rektori lavozimidan ozod etildi va uning o‘rniga shu vaqtgacha Oliy va o‘rta maxsus ta'lim vazirining birinchi o‘rinbosari sifatida ishlab kelgan Kongratboy Sharipov tayinlandi.