Eron o‘zi ishlab chiqargan havo hujumidan mudofaa tizimini sinovdan o‘tkazdi 

Eron 22 noyabrda o‘zi ishlab chiqargan havo hujumidan mudofaa tizimi «Xordad-15»ni sinovdan o‘tkazdi. Bu haqda Mehr axborot agentligi xabar berdi.  

Ma'lum qilinishicha, iyun oyida ilk bor taqdim etilgan tizim Simnan viloyatidagi harbiy mashg‘ulotlar vaqtida muvaffaqiyatli sinovdan o‘tkazilgan.

Yangi tizim 150 km radiusda turli nishonlarni, jumladan harbiy samolyotlar va dronlarni aniqlay oladi. Tizim shuningdek 85 km radiusdagi kam seziluvchi nishonlarni aniqlab, 45 km diapazonda urib tushira oladi. Bundan tashqari, yangi tizim bir vaqtda 6 ta nishonni mo‘ljalda ushlay oladi. Tizimning mobilligi esa harbiylarga uni 5 daqiqadan kamroq vaqt ichida jangovar shay holatga keltirishga imkon beradi.