20:40 / 24.11.2019
0
30763
«Трампни енгиш ва Американи тирилтириш учун». Блумберг президентлик пойгасида қатнашишини эълон қилди
Майкл Блумберг Фото: wikimedia.org

Нью-Йорк шаҳрининг собиқ мэри Майкл Блумберг Демократлар партиясидан АҚШ президентлиги учун сайловларда номзод бўлади.

«Мен Дональд Трампни енгиб, Американи қайта жонлантириш учун президент бўлмоқчиман», — дея ёзган Блумберг твиттердаги саҳифасида.

«У [Трамп] мамлакатимиз мавжудлиги ва анъаналаримизга таҳдид тимсолидир. Агар у яна бир муҳлатга президент бўлса, биз бундан келадиган зарарни ҳеч қачон бартараф эта олмаслигимиз мумкин. Дов ҳар доимгидан ҳам баланд. Биз бу сайловда ғалаба қозонишимиз керак. Биз Американи тирилтиришни бошлашимиз керак», — дейилади Блумбергнинг баёнотида.

Ушбу номзод хайрия маблағларидан воз кечган ва ўз кампаниясини ўзи тўлиқ молиялаштиришини маълум қилган.

Блумбергнинг бош маслаҳатчиси Ҳовард Вольфсон ҳам Блумберг Дональд Трамп 2020 йилда ушбу лавозимга қайта сайланишига имкон бермоқчи эмаслигини таъкидлаб ўтган.

Вольфсоннинг сўзларига кўра, Блумберг «Дональд Трамп устидан ғалаба қозониш учун зарур бўлган барча ишни қилади».

Бундан ташқари, у Блумберг Оқ уй раҳбарига айланадиган бўлса сиёсий хайриялар ва президентлик маошидан воз кечишини қўшимча қилиб ўтди. 

«У умри давомида ҳеч қачон сиёсий хайриялар қабул қилмаган. Уни сотиб олишнинг имкони йўқ», - дея таъкидлаган Вольфсон.

Маълумот учун, Forbes нашри Блумбергнинг бойлигини 54 млрд доллардан ортиққа баҳолаган.

АҚШда навбатдаги президент сайловлари 2020 йилнинг ноябрида бўлиб ўтади.

Мавзу
АҚШ-2020
2020 йилнинг 3 ноябрида АҚШда президентлик сайловлари бўлиб ўтади. 3 февраль куни демократлар қароргоҳида бирламчи сайловлар - кокуслар ва праймеризлар бошланган.
Барчаси
Ушбу хабарга фикрингизни билдиринг. Бунинг учун авторизациядан ўтишингиз керак!
Top