O‘zbekistonda ishlab chiqariluvchi yangi avtomobil taqdimoti bo‘lib o‘tdi. U avvalgilaridan butunlay farq qiladi

Isuzu D-Max pikaplari uchta modifikatsiyada va yettita rangda ishlab chiqariladi. Sotuvlar 2020 yilning yanvar oyidan boshlanadi, ammo hozirdanoq ularga buyurtma berishni boshlash mumkin.

Vazni 865-1100 kg.ni tashkil qiluvchi Isuzu D-Max pikapi 2002 yildan buyon Yaponiyaning Isuzu Motors kompaniyasi tomonidan dunyoning ko‘plab davlatlarida ishlab chiqarib kelinmoqda. O‘zbekistonda bu avtomobilning 2017 yilda ishlab chiqarilgan Isuzu D-Max modifikatsiyasining ikkinchi avlodi tanlab olingan.

SamAuto kompaniyasi Isuzu D-Max pikapining 3 xil– 2 o‘rindiqli, dvigatel hajmi 2,5 litrli D-Max SAHAR, 4 o‘rindiqli, dvigatel hajmi 2,5 litrli D-Max OKSUS, 4 o‘rindiqli, dvigatel hajmi 3 litrli D-Max IRBIS modifikatsiyalarda ishlab chiqaradi va taqdim etadi.

Yiliga 500 tagacha ishlab chiqarilishi mo‘ljallangan bu modellarning narxlari 270-380 mln so‘m oralig‘ida bo‘ladi.

Tantanali ravishda bo‘lib o‘tgan taqdimot marosimi oldidan matbuot anjumani bo‘lib o‘tdi.

Kun.uz vakilining “bu avtomobillarning yoqilg‘i sarfi qanaqa va ularni O‘zbekistonda ommabop bo‘lgan metan yoqilg‘isiga moslashtirish mumkinmi?”-degan savoliga Samarqand avtomobil zavodi bosh direktori o‘rinbosari Husen Qobilov shunday javob berdi:

– Bu avtomobillar Yaponiyada ishlab chiqariluvchilari bilan aynan bir xil, har ikki davlatda sinab ko‘rilganda 12-13 litr atrofida dizel yoqilg‘isi sarflashi ma'lum bo‘lgan. Agar Yaponiya tarafi metanga moslashtirsa, biz ham andoza olib, bu ishni amalga oshirishimiz mumkin. Ammo ayni loyihada metan yoqilg‘isi ko‘zda tutilmagan.