10:56 / 04.12.2019
0
3388
Ўзбекистонда уй-жойларни профессионал бошқариш масаласи кўриб чиқилди

Марказий Осиёдаги кўплаб турар-жойлар энергияни тежаш соҳасидаги модернизацияга муҳтож. Ана шу соҳада хизмат кўрсатувчи кичик ва ўрта корхоналар бозорининг ривожланиши ва уй-жой фондларини бошқаришнинг профессионаллашуви модернизация суръати ва стандартларини оширишда муҳим аҳамият касб этади.

3 декабрь Тошкент шаҳрида бўлиб ўтган “Уй-жойларни профессионал бошқаришга ўтиш – кўп квартирали турар-жой жамғармасини модернизация қилишга тайёрлаш” номли халқаро конференцияда Ўзбекистонда ана шу йўналишда олиб борилган ишлар ҳақида сўз юритилди.

Қайд этилишича, соҳани бошқариш, мувофиқлаштириш Уй-жой коммунал хизмат кўрсатиш вазирлигига берилган, кўп квартирали уйларни бошқариш масалаларини мувофиқлаштириш ишлари вазирлик ва вазирлик тизимидаги ҳудудий бошқарма ва бўлинмаларга юклатилди, кўп квартирали уйларга хизмат кўрсатадиган ширкатларга шароит яратиш мақсадида республиканинг барча вилоятларида ягона ҳисоб-китоб марказлари ташкил этилди.

Тадбирда 2017-2019 йилда Европа Иттифоқининг Central Asia Invest IV - кичик бизнеснинг рақобатбардошлигини кучайтириш дастури доирасидаги Pro House - Қозоғистон ва Ўзбекистонда уй-жойларни профессионал бошқариш лойиҳаси натижаларига тўхталиб ўтилди.

Конференцияни очиб берган Европа иттифоқининг Ўзбекистондаги делегацияси раҳбари, элчи Эдуард Стипрайс қуйидаги маълумотларни келтириб ўтди:

“Яшаш жойи – инсоннинг асосий эҳтиёжларидан бири. Муаммо нимада? Муаммо шундаки, кўп квартирали уйлар – мажмуавий техник тизим. Уй хўжалигини бошқариш учун профессионал кўникмалар зарур. Марказий Осиёнинг барча мамлакатларидаги уй-жой фондининг 75-80 фоизи 1960-йиллардан 1990-йилларнинг бошигача қурилган бинолардир. Ана шу биноларнинг кўпчилиги модернизация қилинмаган ва энергияни тежаш санациясига муҳтож. Марказий Осиё мамлакатлари учун аҳамиятсиз бўлмаган яна бир нарса бу – сув билан таъминлаш масалалари.

Истаймизми, йўқми, келаётган 10 йилликда сув, тоза ичимлик суви бу ерда тобора камайиб боради. Асосий истеъмолчи – қишлоқ хўжалиги, ундан кейин саноат, уй хўжалиги учинчи ўринда. Бироқ аҳоли сонининг ортиши билан коммунал, яшаш эҳтиёжлари учун сув истеъмоли фақат ортиб боради, деб ўйлайман.

Иссиқлик энергияси масаласига қайтадиган бўлсак, уйларда иссиқлик энергиясининг ўртача истеъмоли Европа иттифоқи мамлакатларидаги уйлар билан таққослаганда 2-3 марта кўпроқ. Шунинг учун биноларнинг энергетик модернизацияси бу – катта даъват ва улкан имконият”, деди Эдуард Стипрайс.

Уй-жой коммунал хизмат кўрсатиш вазирлиги матбуот котиби Алипашша Аҳмедов мазкур йўналишда олиб борилаётган ишларга тўхталди:

“Республикамиздаги кўп квартирали уйлар 1970-1990 йилларда шаҳар қурилиши жараёнида қурилган. Албатта, ҳамма нарсанинг ўз хизмат муддати бор. Хориж мамлакатларида шундай ёндашув борки, эски уйни бузиб янгисини қургунча уни санация қилиш, яъни энергия тежамкорлигини ошириш. Бу борада уларда катта тажриба бор. Бугунги кунда республикамизда ҳам бу борада ишлар амалга оширилмоқда. Бугун биз таъмирлаш-тиклаш масалаларига кўпроқ эътибор беряпмиз. Кўп йиллар давомида эътиборсиз қолган уйларни таъмирлаш-тиклаш ишлари билан шуғулланяпмиз. 

Энергия санация деган тушунча бор. Яъни уйларни энергия тежамкорлигини қайта тиклаш масаласи. Бу борада биз нафақат Pro House лойиҳаси доирасида, балки Германиянинг Dena давлат ташкилоти билан ҳам ҳамкорлик ўрнатганмиз. Яқин орада пилот шаклида Қорақалпоғистоннинг Нукус шаҳрида битта уй улар [Dena давлат ташкилоти] томонидан энергия санация ўтказилиб, таъмирлаб берилади”, - дея Алипашша Аҳмедовнинг сўзларини келтирмоқда Kun.uz мухбири.

Ушбу хабарга фикрингизни билдиринг. Бунинг учун авторизациядан ўтишингиз керак!
Top