14:47 / 19.04.2021
4417
Профилактика инспекторларига коммунал хизматлардан фойдаланиш қоидаларини бузганларга жарима қўллаш ваколати берилмайдиган бўлди
Фото: KUN.UZ

Жорий йил 19 апрел куни Қонунчилик палатасининг навбатдаги мажлиси бўлиб ўтди. Унда “Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги қонун лойиҳаси депутатлар томонидан иккинчи ўқишда кўриб чиқилди.

Қуйи палатанинг жорий йил 7 апрел куни бўлиб ўтган мажлисида ушбу лойиҳа қизғин муҳокамаларга сабаб бўлиб, биринчи ўқишда концептуал жиҳатдан қабул қилинган эди. 

Лойиҳа билан электр, иссиқлик энергияси, газ, водопроводдан фойдаланиш қоидаларини бузиш билан боғлиқ маъмурий ҳуқуқбузарликлар тўғрисидаги ишларни кўриб чиқиш ва жазо қўллаш ваколати ички ишлар органлари таянч пунктларининг профилактика (катта) инспекторларига берилаётгани қизғин муҳокамаларга сабаб бўлган эди. Амалда бу турдаги қоидабузарликлар билан Мажбурий ижро бюроси органлари шуғулланиб келган.

Муҳокамаларда депутатлар ички ишлар органлари таянч пунктларининг профилактика (катта) инспекторларига қўшимча тариқасида берилаётган  вазифалар қатор муаммоларни келтириб чиқаришини таъкидлади. Халқ вакиллари фикрича, бу уларда асосий ишидан ташқари иш кўлами ортишига, манфаатлар тўқнашуви, коррупцион ҳолатлар кўпайишига сабаб бўлиши мумкин. 

Мунозараларда иштирок этган ИИВ масъуллари ҳам белгиланаётган нормаларга қўшилмасликларини билдириб, бугунги кунда профилактика инспекторлари зиммасига кўплаб вазифалар юклатилаётгани, ҳар қайси жиҳатдан ёндашилган тақдирда ҳам қўйилган вазифани бажаришга амалий вақт етмаслигини, қолаверса, профилактика инспекторлари бу соҳада алоҳида мутахассис эмасликларини қайд этдилар. 

Қонун лойиҳаси овозга қўйилгач, депутатларнинг кўпчилиги унга қарши овоз берди. Мажлисда қонун лойиҳаси масъул қўмитага қайтарилди.

Top