Toshkentdagi yangi uylar aholisi o‘z-o‘zicha aylanaveradigan gaz hisoblagichlaridan shikoyat qildi 

Toshkentdagi yangi qurilgan uylar aholisi gaz quvuriga ulanmagan bo‘lsa ham o‘z-o‘zicha aylanaveradigan gaz hisobagichlaridan shikoyat qilishdi.

“Ko‘p xonadonli uyimizda gaz hisoblagichlari o‘rnatilgandi. Hamma qo‘shnilar gazga ko‘p pul to‘layotganlaridan shikoyat qila boshlashdi”, deb yozgan Facebook’dagi “Potrebitel” guruhi foydalanuvchilaridan biri.

Xabarga ilova qilingan videoda bir erkak qo‘lida “SGU-G6” markasidagi hisoblagichni ushlab turganini ko‘rish mumkin. Qizig‘i shundaki, qurilma gaz quvuriga ulanmagan bo‘lsa ham ko‘rsatkichni o‘zgartirishda davom etgan.

“Hammada hisoblagichlar bir xil. Men ham hayron bo‘ldim. Uyimda bir yildan beri yashamayman, uni ta'mirlayotganim uchun undan deyarli foydalanmaganman. Biroq gazga 900 ming so‘m yozilipti. Odatdagidek MIBdan kelishgandi va men to‘lovni amalga oshirdim”, deb aytgan iste'molchi.

So‘ngra mahalliy aholi yig‘ilib, vaziyatga oydinlik kiritishga qaror qilgan.

“Qo‘shnilar bilan yig‘ilish o‘tkazdik va bir oyda 2,7 mln so‘mlik gaz yozilgan odamlar borligi aniqlandi. Qo‘shnining hisoblagichini yechib oldik, u esa aylanishda davom etaverdi. Uyni qurgan tashkilotning ta'kidlashicha, u unga ruxsat berilgan hisoblagichlarni o‘rnatgan va buni isbotlashga tayyor”, deb aytgan mahalliy fuqaro.

Shuningdek, qurilish tashkiloti avvalroq sotib olgan boshqa hisoblagichlarni o‘rnatmoqchi bo‘lgani, biroq tuman gaz ta'minoti bo‘limida unga “SGU-G6” markasidagi hisoblagichlarni o‘rnatish buyurilgani ma'lum bo‘lgan.

“Potrebitel” guruhi a'zolari bu holatga turlicha munosabat bildirishgan.

Ulardan birining ta'kidlashicha, bunday hisoblagichlarning O‘zbekistonga olib kirilishi 2017 yildayoq taqiqlangan. Shunga qaramay, ko‘plab yangi uylarda gaz ta'minoti korxonalari hanuzgacha bu qurilmadan foydalanmoqda. 

Boshqa foydalanuvchilarning aytishicha, ularda ham shunday hisoblagich o‘rnatilgan bo‘lgan. Ular oxir-oqibat hisoblagichni almashtirishgan, biroq avvalgi hisoblagich yozgan gaz uchun baribir mo‘maygina pul to‘lashlariga to‘g‘ri kelgan.