«Human xususiy bandlik agentligi» MChJ faoliyatiga oid sud jarayonida xorijga ketish orzusida turli miqdordagi mablag‘larga chuv tushgan fuqarolar Oliy sud sudida qatnashmaydi. Bu haqda Toshkent shahridagi Interpol milliy markaziy byurosida IIV tomonidan «Human xususiy bandlik agentligi» MChJ mansabdor shaxslariga nisbatan qo‘zg‘atilgan jinoyat ishi bo‘yicha olib borilgan dastlabki tergov harakatlari yuzasidan o‘tkazilgan matbuot anjumanida ma'lum qilindi.
Ma'lum qilinishicha, ular o‘z hududlaridagi viloyat sudlarida tashkil etiladigan videokonfrensaloqa vositalari orqali ishtirok etishadi.
«Olis sud tomonidan fuqarolarga ushbu ish qachon, qayerda va qay tartibda ko‘rilishi bo‘yicha rasmiy ma'lumot beriladi. Shuni aytishim mumkinki, jabrlanuvchilar respublikaning turli hududlaridan ekanligini inobatga olgan holda sud majlisida o‘zlari yashab turgan viloyat markazlaridagi sudlarda bo‘ladigan videokonfrensaloqa vositalari yordamida ishtirok etishadi. Hech kim Toshkentga kelib-ketib yurmaydi.
Sud tomonidan chaqirilganda, aytilgan muddatga uyushgan tartibda borib, o‘z ko‘rsatmalaringizni videokonfrensaloqa vositalari yordamida berish so‘raladi. Tezroq ko‘rsatma berilsa, sud tomonidan ham qonuniy qaror tezroq chiqadi», deya IIV Tergov departamenti boshlig‘i o‘rinbosari Oybek Qulbekovning so‘zlarini keltirmoqda Kun.uz muxbiri.
IIV rasmiysining aytishicha, ayni paytda «Korean and migration» hamda «Profelite IMP» xususiy bandlik agentliklari bo‘yicha dastlabki tergov harakatlari olib borilyapti.
Tadbirda agentlikning ayrim hududlardagi vakillari hamda aldangan fuqarolar ham qatnashdi.
«Human xususiy bandlik agentligi» MChJning bir muddat Farg‘ona viloyatidagi vakili bo‘lib faoliyat yuritgan Inomjon A'zamovning aytishicha, u ham firma rahbariyatining fikrlariga ishonib, hamkorlikda ishlashga rozi bo‘lgan.
«Agentlikning Farg‘onadagi vakili sifatida 10 oy menejyer lavozimida ishladim. Shartnoma tuzishayotganda bizni ham ishontirishgan. Bir qancha davlat bilan imzolagan shartnomalarini ko‘rsatishgan. Faoliyatim davomida 87 nafar fuqaro bilan shartnoma tuzganman. Ular bilan haligacha aloqadaman. Yarmi qarindosh-urug‘im, sinfdoshlarim bo‘ladi.
Agentlik faoliyati bo‘yicha qilinayotgan ishlarni tez-tez ommaga taqdim etsalaringiz yaxshi edi. Chunki pul berib, aldangan fuqarolar bizning gapimizdan ko‘ra, sizning ma'lumotlaringizga ko‘proq ishonishadi, turli namoyishlar o‘tkazish fikridan qaytishadi. Sud qachon o‘tkazilishi, ular pulini qanday olishi haqida ham ma'lumotlar ochiq havola qilinib borilsa, degan fikrdaman. Har kuni 30-40 nafarining savoliga javob qaytaraman.
«Human» faoliyati yuzasidan bo‘lgan tergov jarayonlarida qatnashdim. Agentlik tomonidan plastigimga tushirilgan oyliklar va mukofot pullari hujjatlarini firma buxgalterlari yo‘q qilib yuborishganmi, tergov paytida buni isbotlay olmadim. Natijada sudgacha bo‘lgan vaqt uchun vaqtincha IIV depozitiga 50 million so‘m qo‘ydim. Bu mablag‘ni uyimdagi bor-budimni sotib, qarz-havola orqali yig‘gandim», deydi Inomjon A'zamov.
Bundan avvalroq Bosh prokuratura «Human» agentligi mansabdor shaxslariga nisbatan ochilgan jinoyat ishi bo‘yicha tergov harakatlari yakunlanib, ish sudga oshirilgani haqida xabar bergandi.
