Qirg‘iziston parlamenti avgustdagi tartibsizliklar uchun javobgarlikni Atamboyev zimmasiga yukladi

Shuningdek, tartibsizliklarni tergov qilish bo‘yicha komissiya a'zolari sobiq prezident hokimiyatni zo‘ravonlik bilan egallab olishni tayyorlagani haqidagi qarorga kelishgan.  

Komissiya qarorini ma'qullash uchun 120 deputatdan 87 nafari ovoz bergan. Komissiya xulosalariga ko‘ra, Qirg‘iziston milliy xavfsizlik davlat qo‘mitasi va ichki ishlar vazirligi rahbariyatining o‘sha voqealar vaqtidagi xatti-harakatlari “yo‘l qo‘yilgan xato va kamchiliklarga qaramay, Qirg‘iziston konstitutsiyasi me'yorlari va qonunlariga asoslangan bo‘lgan”.

Atamboyevni qo‘lga olish bo‘yicha amaliyot uning Bishkekdan 20 km uzoqlikda joylashgan Qo‘y-Tosh qishlog‘idagi uyida 7-8 avgust kunlari o‘tkazilgan. Kuch tuzilmalari xodimlari va sobiq prezident tarafdorlari o‘rtasida yuz bergan to‘qnashuvlar vaqtida 136 kishi jabrlangan, bir maxsus jangchi halok bo‘lgan. O‘shandagi voqealar Atamboyevning kuch tuzilmalariga taslim bo‘lishi bilan yakun topgan.