Behzod Musayev: «Ikki yillik moratoriy tugasa ham, tadbirkorlarni yoppasiga tekshirish boshlanib ketmaydi»

2018 yil boshida O‘zbekistonda tadbirkorlik sub'yektlari faoliyatini tekshirishga ikki yillik moratoriy e'lon qilingan edi. Davlat soliq qo‘mitasi raisi Behzod Musayevning aytishicha, muddat yakunlanganidan keyin ham tadbirkorlarni yoppasiga tekshirish bo‘lmaydi.

«Prezidentimiz tomonidan joriy etilgan, tadbirkorlarni tekshirishni cheklashga qaratilgan ikki yillik moratoriy muddati tugamoqda. Lekin shuni rasman ta'kidlab o‘tmoqchimanki, bu muddat tugasa-da, tadbirkorlarimizni yoppasiga tekshirish boshlanib ketmaydi.

Xavflarni tahlil qilish dasturiga muvofiq, amaldagi barcha xo‘jalik yurituvchi sub'yektlar ma'lum mezonlar asosida avtomatik ravishda 3 segmentga – yashil, sariq va qizil yo‘laklarga bo‘linadi.

Qizil yo‘lakdagi tadbirkorlar muntazam qoidabuzarlar bo‘lib, ularni tekshirishga asos bor. Sariq yo‘lakdagilar ba'zan qoida buzishadi, ular maslahatga muhtoj. Yashil yo‘lakdagilar esa barcha qoidalarga rioya qilishadi, tabiiyki ular tekshirilmaydi», – dedi Behzod Musayev seshanba kuni bo‘lib o‘tgan matbuot anjumanida.