«Amirsoy» tog‘-chang‘i kurorti rasman ochildi

Bugun, 21 dekabr kuni, Toshkent viloyati, Bo‘stonliq tumanidagi “Chimyon” dam olish maskani negizida “Amirsoy” tog‘-chang‘i kurorti ochilish marosimi bo‘lib o‘tdi. Unda Turizmni rivojlantirish davlat qo‘mitasi vakillari, Qozog‘iston Respublikasi madaniyat va sport vaziri Aktota Raimqulova, bosh vazir o‘rinbosari Aziz Abduhakimov, “PGI Management” kompaniyasi rahbari Tomas Tor-Yyensen hamda OAV xodimlari ishtirok etdilar. Marosimni Aziz Abduhakimov ochib berdi.

“Amirsoy” tog‘-chang‘i kurorti ikki yil oldin Prezident tashabbusi bilan boshlangan loyiha edi. Uning 2 ta bosqichining birinchisi o‘z nihoyasiga yetkazildi. Bunga 80 mln yevrodan ortiq investitsiya kiritildi. Hukumat tomonidan yo‘l, elektr quvvati infratuzilmasi ham yaratib berildi. Ushbu kurort 800 gektardan ortiq maydonni egallagan bo‘lib, 580 o‘ringa mo‘ljallangan. 

Mavzuga oid: Fotojamlanma: “Amirsoy” tog‘-chang‘i kurorti mehmonlarga xizmat ko‘rsatishni boshladi

Kurortning bir nechta muhim jihatlarini sanab o‘tmoqchiman. Birinchisi, ijtimoiy ahamiyati: mehmonlarga xizmat ko‘rsatuvchi shaxobchalar ochilishi evaziga mahalliy aholi uchun ko‘plab yangi ish o‘rinlari yaratiladi. Ikkinchisi, iqtisodiy ahamiyati: transport va boshqa turdagi xizmatlardan keladigan daromad iqtisodiyotga foyda olib keladi. Uchinchisi, turizm salohiyati: ilgarilari O‘zbekistonga asosan, bahor va yozda sayyohlar kelardi. Endilikda kurort ochilishi munosabati bilan qishda ham sayyohlarni kutib olish imkoniyatimiz bor. Shu tariqa O‘zbekistonda yil bo‘yi turistik oqim to‘xtamaydi, deb umid qilamiz”, - deya uning so‘zlarini keltirmoqda kun.uz muxbiri.

“Amirsoy” tog‘-chang‘i kurortini ishga tushirish uchun Italiya, Germaniya, Avstriya, Argentina, Ispaniya va Daniya kabi davlatlardan yetakchi loyihachi kompaniyalar jalb etilgan bo‘lib, xavfsizlik masalalariga alohida ahamiyat berilgan.

Eslatib o‘tamiz, 22 dekabr kuni olib boriladigan profilaktik va hududni tozalash ishlari tufayli “Amirsoy” tog‘-chang‘i kurorti o‘z faoliyatini to‘xtatib turadi va mehmonlarning hududga kirishi taqiqlanadi. 23 dekabrdan kurort faoliyatini davom ettiradi.