Ilm-fan va ta'lim sohasidagi qator xodimlarning maoshiga qo‘shimcha haq to‘lash tizimi joriy etildi

Vazirlar Mahkamasining “Ilm-fan va ta'lim sohasidagi davlat tashkilotlarida ilmiy, ilmiy-pedagogik va mehnat faoliyati bilan shug‘ullanuvchi ilmiy darajaga ega xodimlarga qo‘shimcha haq to‘lash tartibi to‘g‘risida”gi qarori qabul qilindi.

Ilm-fan va ta'lim sohasidagi davlat tashkilotlarida ilmiy-pedagogik va mehnat faoliyati bilan shug‘ullanuvchi xodimlarning lavozim maoshiga:

fan nomzodi yoki falsafa doktori (PhD) (yoki xorijiy mamlakatlarda ularga tenglashtirilgan darajalar) ilmiy darajasiga ega shaxslar uchun - lavozim maoshining 30 foizigacha;

fan doktori (Doctor of Science) (yoki xorijiy mamlakatlarda unga tenglashtirilgan daraja) ilmiy darajasiga ega shaxslar uchun - lavozim maoshining 60 foizigacha qo‘shimcha haq to‘lash tizimi joriy etildi.

Ilm-fan va ta'lim sohasidagi davlat tashkilotlarida ilmiy, ilmiy-pedagogik va mehnat faoliyati bilan shug‘ullanuvchi ilmiy darajaga ega xodimlarga qo‘shimcha haq to‘lash tartibi to‘g‘risidagi nizom tasdiqlandi.

Belgilanishicha:

a) qo‘shimcha haq ushbu qarorga muvofiq tegishli mezonlarni bajarilishini baholash natijalari bo‘yicha hamda tarkibiy bo‘linma rahbarining taqdimnomasi va tashkilot kollegial organi qarori asosida har bir xodimning ilmiy-pedagogik va mehnat faoliyatiga qo‘shgan aniq hissasini hisobga olgan holda belgilanadi;

b) ushbu qaror bilan joriy etilayotgan qo‘shimcha oylik va bir martalik to‘lovlar miqdori bir oyda - falsafa doktori ilmiy darajasiga ega xodimlar uchun lavozim maoshining 30 foizidan hamda fan doktori ilmiy darajasiga ega xodimlar uchun lavozim maoshining 60 foizidan oshmasligi kerak;

v) O‘zbekiston Respublikasi Davlat budjetidan moliyalashtiriladigan tashkilotlar xodimlariga ushbu qarorga muvofiq qo‘shimcha haq belgilanishi bilan bog‘liq xarajatlarni moliyalashtirish O‘zbekiston Respublikasi Davlat budjeti mablag‘lari hisobidan amalga oshiriladi;

g) ushbu qarorga muvofiq qo‘shimcha haq to‘lash bilan bog‘liq bo‘lgan xarajatlarni moliyalashtirish uchun O‘zbekiston Respublikasi Davlat budjeti mablag‘lari hajmini rejalashtirish falsafa doktori ilmiy darajasiga ega xodimlar lavozim maoshining 30 foizi miqdorida qo‘shimcha haq va fan doktori ilmiy darajasiga ega bo‘lgan xodimlar lavozim maoshining 60 foizi miqdoridagi qo‘shimcha haqning eng ko‘p hajmi ilmiy darajaga ega bo‘lgan xodimlarning haqiqiy sonidan kelib chiqqan holda band bo‘lgan shtat birligi soni bo‘yicha amalga oshiriladi;

d) tashkilotga qo‘shimcha haqni moliyalashtirish uchun ajratilgan va moliya yili yakuniga qadar ishlatilmay qolgan budjet mablag‘lari o‘rnatilgan tartibda budjet tashkilotining rivojlantirish jamg‘armasiga o‘tkaziladi va quyidagi maqsadlarda sarflanadi:

tashkilotning moddiy-texnik bazasini mustahkamlash, bino va inshootlarni, ilmiy laboratoriyalarni texnik shartlar asosida joriy ta'mirlash va jihozlash, xalqaro ilmiy axborot bazalari va kutubxona resurslariga ulanish, axborot-kommunikatsiya texnologiyalarini joriy qilish;

xodimlarni yetakchi milliy va jahonda eng yuqori 1000talik reytingga kiruvchi yoki yo‘nalishlar bo‘yicha jahonda eng yuqori 100talik reytingga kiruvchi xorijiy ilmiy-ta'lim muassasalariga qayta tayyorlov, malaka oshirish va amaliyotga yuborish orqali kadrlar ilmiy salohiyatini oshirish, xodimlar tomonidan xorijiy ilmiy anjumanlarda ma'ruza bilan ishtirok etish va qatnashish, xalqaro tan olingan ma'lumotlar bazasidagi yetakchi ilmiy jurnallarda ilmiy-tadqiqot ishlari natijalarini nashr qilish.

O‘zbekiston Respublikasi Moliya vazirligi 2020 yildan boshlab O‘zbekiston Respublikasi Davlat budjetining tasdiqlangan parametrlari doirasida ushbu qarorda nazarda tutilgan tadbirlarni moliyalashtirish uchun mablag‘larni ajratadi.

Tizimida tashkilotlar mavjud bo‘lgan vazirlik va idoralar:

ushbu qarorga muvofiq xodimlarga qo‘shimcha haq belgilanishining asoslanganligi, shuningdek, ularni to‘lash uchun ajratilgan mablag‘lardan maqsadli foydalanilishini doimiy nazorat qilib boradi;

har yili 25 dekabrga kadar O‘zbekiston Respublikasi Moliya vazirligiga ushbu qarorga muvofiq qo‘shimcha haq to‘lash huquqiga ega bo‘lgan xodimlarning band bo‘lgan shtat birligi soni to‘g‘risida, shuningdek, ularni to‘lash uchun ajratilgan mablag‘lar, shu jumladan, moliya yili oxirida sarf qilinmagan moliya hajmi to‘g‘risidagi ma'lumotlarni taqdim etib boradi;

bir oy muddatda manfaatdor vazirliklar va idoralar bilan birgalikda o‘zlari qabul qilgan normativ-huquqiy hujjatlarni ushbu qarorga muvofiqlashtiradi.