«Oltita tumanda yer onlayn auksion orqali ijaraga beriladi. Jarayonga hokim aralashmaydi» – Qishloq xo‘jaligi vaziri

O‘zbekiston respublikasining 6ta tumanida yer onlayn auksion orqali ijaraga beriladi. Bu jarayon hokimlarning aralashuvisiz kechadi. Bu haqda Qishloq xo‘jaligi vaziri Jamshid Xo‘jayev bugun Toshkentda boshlangan «Umid 2.020» xalqaro konferensiyasi vaqtida aytib o‘tgan.

«Tajriba sifatida oltita tumanda qishloq xo‘jaligi yerlarini auksion orqali ijaraga berishni joriy etmoqchimiz. Ijara shartnomasi shartlarini qaytadan ko‘rib chiqmoqchimiz. Qolaversa, shartnoma shunaqangi puxta tuziladiki, yer hokimning qarori bilan olib qo‘yilmaydi, buning uchun sudning qarori kerak bo‘ladi. Lekin ijaraga oluvchi ham shartnomada ko‘rsatilgan majburiyatlarini bajarishi shart bo‘ladi, shartnoma shartlarini lozim darajada bajarmaslik yerdan foydalanish huquqi bekor bo‘lishiga olib kelishi mumkin.

Yerlarni kimlarga ajratish kerakligini ham ko‘rib chiqyapmiz. Bugungi kunda 4 mln gektar yer 76 ming fermerga tegishli, bu masalaniyam muhokama qilyapmiz», deya Jamshid Xo‘jayevning so‘zlaridan iqtibos keltirmoqda Kun.uz muxbiri.

Vazirning aytishicha, yerni ijaraga berishda yangi tizim joriy etilishi kutilmoqda. Unga ko‘ra yerni ijaraga va subijaraga olish mumkin bo‘ladi.

«Qishloq xo‘jaligi vazirligining oldida juda katta savollar turibdi. Yerdan samarali foydalanish uchun nimalar qilishimiz kerak? Bu sohada yana bir marta islohot qilsak, odamlarning davlatga ishonchi yo‘qolmasmikin? Bugungi kunda 100 gektar yerdan bitta fermer foydalanayotgani to‘g‘rimi-yo‘qmi? Shu kabi savollarga javob topish uchun ham oltita tumanda eksperiment qilmoqchimiz.

Bu onlayn tizim, hech qanday hokimning aralashuvisiz yerni ijaraga berish tizimi. Ijaraga beriladigan yerlar masalasi ham muammo. Hokimliklarga yer so‘rab borsangiz rad javobini olishingiz aniq, chunki qishloq xo‘jaligi yerlarining hammasi egali, bo‘sh turgan yer yo‘q. Auksion qilish uchun yer so‘rasak, chetdagi, suv bormaydigan yerni ko‘rsatishadi. Yerni auksion orqali ijaraga berish tizimini joriy etishdan ko‘zlangan asosiy maqsad yer berish tizimini isloh qilish. Ayni paytda bu haqdagi hamma gapni ochiqlay olmayman, chunki amalga oshirilishi rejalashtirilayotgan o‘zgarishlar muhokama jarayonida. Hali ekspertlar bilan maslahatlashimiz kerak», degan Jamshid Xo‘jayev.

U sohadagi islohotlarni, rejalarni malakali kadrlarsiz amalga oshirish mushkul ekanini, shu jihatdan birinchi marta o‘tkazilayotgan «Umid 2.020» xalqaro konferensiyasi O‘zbekiston uchun muhim voqea hisoblanishini ta'kidladi.

«Chet elda tahsil olgan, ayni paytda ham xorijda ishlab kelayotgan o‘zbekistonlik mutaxassislar vatanga qaytib, yangilanayotgan O‘zbekiston rivojiga o‘z hissalarini qo‘shish istagini bildirishmoqda yoki o‘zlarining bilimlari, takliflari bilan yordam berishmoqchi.

Qishloq xo‘jaligiga ilg‘or texnologiyalarni joriy etish mavzusidagi seksiyada ham juda qiziqarli ma'ruzalar, muhokamalar bo‘ldi. Qishloq xo‘jaligi sohasini iqtisodiyotimizning eng asosiy tarmog‘i deb oladigan bo‘lsak, sohaga mana shunday kadrlarni, mutaxassislarni jalb qilish asosiy vazifalardan biri deb o‘ylayman. Chunki kadrlarsiz o‘ylagan rejalarimizni amalga oshirish judayam mushkul bo‘ladi», deydi Jamshid Xo‘jayev.