Navoiy viloyati hokimi eng ko‘p shikoyat bo‘ladigan sohalarni ma'lum qildi

Viloyat rahbarining ma'lum qilishicha, murojaatlarning eng ko‘pi uy-joy masalasida bo‘ladi.

«Hamma ham yaxshi yashashni istaydi va murojaat qiladi. Bizga uy-joy masalasida eng ko‘p murojaat bo‘ladi. Ayniqsa, Karmana tumani va Navoiy shahridan bunday mazmundagi shikoyatlar soni nisbatan ko‘p. Shunga qarab uy-joylar qurilishida hududlarga ham e'tibor beramiz.

Murojaatlar soni bo‘yicha keyingi o‘rinda bandlik masalasi turibdi. Aslida ishsizlik muammosi dunyoning barcha mamlakatida bor, jumladan, bizda ham. Respublikamizda ishsizlik darajasi 8,9 foizni, Navoiy viloyatida 8,5 foizni tashkil etadi. 

Sohadagi yana bir muammo — norasmiy ish o‘rinlari bizda ham bor, misol uchun, o‘tgan yil davomida 38 ming ta norasmiy ish o‘rinlarini legallashtirdik», deya Qobil Tursunovning so‘zlarini keltirmoqda Kun.uz muxbiri.

Tadbirda shuningdek, bugungi kunda respublikada aholi jon boshiga yalpi hududiy mahsulot, sanoat mahsulotlari, qishloq xo‘jalik mahsulotlari ishlab chiqarish, o‘zlashtirilgan investitsiyalar hajmlari bo‘yicha Navoiy viloyati birinchi o‘rinni o‘rinni egallashi qayd etib o‘tildi.

Viloyat rahbarining ma'lum qilishicha, mazkur viloyat qurilish ishlari, ko‘rsatilgan xizmatlar hajmi va chakana savdo aylanmasi bo‘yicha ham yuqori pog‘onada — ikkinchi o‘rin. Mahsulot va xizmatlar eksporti yo‘nalishida Navoiy viloyati respublikaning eng yaxshi natijaga ega viloyatlari qatorida — uchinchi.

Navoiyda kimyo sanoati uchun fosforit rudasi, mineral tuz, chinni uchun kaolin rudasi, shisha va keramika sanoati uchun dala shpati va kvars, zargarlik buyumlari uchun feruza, opal, kaxolong kabi zaxiralari mavjud. Shuningdek, viloyat qator pardozbop toshlar, shisha xomashyosi, sement, ohak, keramzitning katta zaxiralariga ega.  

Viloyatni ijtimoiy-iqtisodiy rivojlantirish dasturlarini shakllantirish va amalga oshirishda ana shu zaxiralardan unumli foydalanish rejalashtirilgan.

Dasturlar doirasida so‘nggi uch yilda, umumiy qiymati 7,9 trln so‘m miqdoridagi mablag‘larni o‘zlashtirish hisobiga 2 678ta loyihalar amalga oshirilgan.