Turizm sohasida tadbirkorlar kam, borlari ham bir xil yo‘nalishga moslashib qolgan – Abdulaziz Aqqulov

“Germaniyaga ITP yarmarkasiga O‘zbekistondan 15ta turfirma boradi. Barchasida bir xil turpaket – Toshkent, Samarqand, Buxoroga sayohat paketlari sotiladi. Bittasiga Nurota, bittasiga boshqa bir joy aralashib qolishi mumkin. Bo‘ldi, boshqa hech narsa yo‘q. Nimaga buni diversifikatsiya qilmasligimiz kerak? Nimaga yangi-yangi joylarni ko‘rsatmasligimiz kerak? O‘sha jihatdan yangi tadbirkorlar guruhini shakllantirishga muhtojmiz”, deya Abdulaziz Aqqulovning so‘zlarini keltirmoqda Kun.uz muxbiri.

Qo‘mita raisining ta'kidlashicha, viza tizimining yengillashayotgani, fuqaro aviatsiyasi sohasida kutilayotgan islohotlar natijasida yoshlar kelgusida turfirma ochib o‘tirishi shartmas. U yoshlar yangi-yangi startaplar qilib, elektron to‘lovlar orqali xizmat ko‘rsatish tizimini yo‘lga qo‘yishsa, Turizmni rivojlantirish davlat qo‘mitasi ularni qo‘llab-quvvatlashga tayyorligini bildirdi.

“Surxondaryo viloyatida So‘fi Olloyor ziyoratgohi bor, buni ko‘pchilik biladi. Bu joy biz uchun eskitdan qadrli ziyoratgohlardan hisoblanadi. Lekin bu joydan uch kilometrcha oldinroqda Muhammadzohid hazratlarining ziyoratgohlari bor. So‘fi Olloyor ziyoratgohidan qaytishda yo‘l-yo‘lakay kirganimizda bu yerda “Silsilai oliya”ga kirgan ajdodlarimizning maqbaralarini ziyorat qilib yurgan turk ziyoratchilarini ko‘rdik. Eng qizig‘i, ziyoratgohda o‘tirganlar Muhammadzohid hazratlarining “Silsilai oliya”ga kirish-kirmasligi haqida ma'lumotga ega emas. Lekin aynan shu qadamjoda kelgan-ketganlarga qarab o‘tirishibdi, marhumning haqqiga tilovat qilib odamlarni jo‘natvorishyapti.

Odamlarning oqimi So‘fi Olloyor ziyoratgohiga besh barobar ko‘p, Muhammadzohid hazratlarining ziyoratlariga ayrimlar yo‘l-yo‘lakay kirib o‘tishyapti. Keyinchalik bu shaxsning qilgan ishlarini, dinni tarqatishdagi rolini o‘rgandik, ushbu ziyoratgohga kelgan turklarning qo‘lida Muhammadzohid hazratlari haqidagi kitoblarni ko‘rgandik, ularni hozir o‘zbek tiliga tarjima qildiryapmiz. O‘z atrofimizdagi, o‘zimizdagi bor narsalarni to‘liq o‘rganmas ekanmiz, rivojlanish bo‘lishi qiyin”, dedi Abdulaziz Aqqulov.

Ochiq muloqot davomida Abdulaziz Aqqulov yig‘ilganlarni qiziqtirgan savollarga javob berdi, yoshlarning jo‘yali takliflarini amalga oshirish bo‘yicha mutasaddilarga topshiriqlar berdi.

Turizmni rivojlantirish davlat qo‘mitasi boshqarma boshlig‘i O‘tkir Saidovning aytishicha, bunday formatdagi uchrashuvlar har oyda bir marta bo‘lib o‘tishi va respublikaning barcha hududlarini qamrab olishi rejalashtirilgan.