«Narxoz» degan universitetni eslasam, kayfiyatim buziladi» – prezident oliy ta'limdagi korrupsiya haqida

Prezident Shavkat Mirziyoyev Senatning ilk yalpi majlisidagi chiqishida oliy ta'lim sohasidagi korrupsiya haqida gapirib, Toshkent davlat iqtisodiyot universitetini yodga oldi.

«Bizdagi tahlillar bo‘yicha, O‘zbekistonda eng katta korrupsiya hozircha uchta soha – tibbiyot, oliy ta'lim va qurilishda.

Bitta misol aytaman. «Narxoz» degan universitetni eslasam, kayfiyatim buziladi. Xodiyev degan bir vallomatni ishdan oldik. Bilasizlarmi, yangi qo‘ygan rektorimiz oddiy attestatsiya o‘tkazdi, har bir domlaning fan bo‘yicha bilimlari sinaldi. 65 foizi domlalar o‘tmadi. 35 emas, 65.

Hamma studentlar, bechoralar qanday o‘qib yurishibdi, tasavvur qilib bo‘lmaydi», – dedi davlat rahbari.

• Bahodir Xodiyev «Narxoz» rektorligidan bo‘shatildi. Universitetda «katta tozalash ishlari» o‘tkaziladi

Prezident senatorlarni oliy ta'limdagi korrupsiyaga qarshi kurashishda faollikka chaqirib, hokimlar rektorlarni ham Kengash majlislariga jalb etishi kerakligini aytdi.

«Muayyan hudud taqdiri ishonib topshirilgan ayrim mansabdorlarning poraxo‘rlik va korrupsiya jinoyatiga qo‘l urayotgani tashvishli holdir. Joylardagi rahbarlarning qonunga zid faoliyati doimo hududlarda faoliyat olib borayotgan senatorlarning e'tibor markazida bo‘lishi kerak.

Bir so‘z bilan aytganda, har bir senator korrupsiyaga qarshi kurashishning oldingi saflarida bo‘lishi shart.

Jamiyatimizda qizg‘in bahslarga sabab bo‘layotgan holatlar yuzasidan Senat a'zolari yalpi majlisni kutib o‘tirmasdan, tezkor eshituvlar tashkil etib, mutasaddi shaxslardan izoh talab etishi zarur», – dedi Shavkat Mirziyoyev.

Davlat rahbari 24 yanvar kuni parlamentga yo‘llaydigan murojaatnomasida korrupsiyaga qarshi kurashish bo‘yicha institutsional takliflar bo‘lishini ham qo‘shimcha qildi.