19:42 / 02.02.2020
7
156476
Хитойдан келувчиларга чегаралар ёпилмоқда, ўлим ҳолатлари ортмоқда. Коронавирус бўйича сўнгги маълумотлар

Янги 2019-nCov коронавируси тарқалишининг олдини олиш учун Хитойдан келувчилар учун ўз чегараларини ёпаётган давлатлар сони ортмоқда. 2 февраль куни илк марта Хитой ҳудудидан ташқарида ушбу вирусдан ўлим ҳолати қайд этилди - Филиппинда 44 ёшли хитойлик вафот ўтди. У ўлимга олиб келувчи эпидемия тарқалиши бошланган Ухандан келганди.

Фото: EPA

Ўзбекистон ҳукумати ҳам Хитой билан авиаалоқаларни вақтинча тўхтатган. 29 январь куни «Ўзбекистон Республикасига коронавируснинг кириб келиши ва тарқалишининг олдини олиш юзасидан чора-тадбирлар дастурини тайёрлаш бўйича республика махсус комиссиясини ташкил этиш тўғрисида» президент фармойиши қабул қилинган.

4 февраль кунидан Uzbekistan Airways авиакомпанияси коронавирус тарқалиши сабабли Хитойга (Пекин ва Урумчи) мунтазам рейсларни вақтинча тўхтатади. 

Соғлиқни сақлаш вазирлиги Ўзбекистонда коронавирус юқтирган бемор йўқлигини маълум қилган. Сўнгги ҳафталарда мамлакатдаги барча чегара пунктларида кириб келувчилар қатъий назоратдан ўтказилмоқда.

31 январь куни Тошкент халқаро аэропорти орқали хориждан учиб келган жами 4194 нафар, темир йўллари орқали эса 953 нафар фуқаро санитария-карантин пунктларида термометриядан ўтказилган. Натижада Санитария-эпидемиологик осойишталиги агентлигининг вирусология лабораториясига коронавирусга текшириш учун 21 нафар фуқародан намуналар олинган. Ўтказилган тиббий текширувлар натижасида намуналар орасида коронавирус касаллигининг вируси топилмаган.

Ўзбекистон 4-5 февраль куни махсус чартер рейслар орқали Хитойдаги, жумладан, Уханда қолаётган фуқароларни (Ташқи ишлар вазирлиги маълумотига кўра Уханда айни вақтда 81 нафар ўзбекистонлик бор) ватанга олиб келишни режалаштирмоқда.

Вирус қурбонлари ҳақида сўнгги маълумотлар

Хитой Халқ Республикаси давлат соғлиқни сақлаш қўмитасининг сўнгги маълумотларига кўра, 2019-nCov коронавируси юқиши оқибатида юзага келган пневмониядан вафот этганлар сони 304 нафарга етган, шунингдек 14 380 киши вирусдан зарарланган. Бир кун ичида яна 2590 кириши вирусни юқтириб олгани аниқланган. 2110 киши оғир аҳволда қолмоқда, 328 киши тузалган.

ХХРдан ташқарида яна 100га яқин вирусдан зарарланиш ҳолатлари аниқланган.

Ўлим ҳолатидан кейин Манила аҳолиси тиббий ниқоблар учун ёпирилиб келди

Филиппинда январь ойида Ухандан рафиқаси билан келган 44 ёшли хитойлик вафот этди. У вирусни Хитойдалигида юқтириб олган, ўзини ёмон ҳис қила бошлагач Маниладаги шифохонага ётқизилганди. Унинг аҳволи барқарор бўлиб турганди, сўнгги 24 соат ичида эса оғирлашиб вафот этган. Бу Хитой ҳудудидан ташқаридаги илк ўлим ҳолати бўлди. Мамлакат ҳукумати Хитойнинг Маниладаги элчихонаси билан доимий алоқада бўлиб турибди. Марҳумнинг жасади катта эҳтимол билан куйдирилади.

Ҳозирда у билан бир рейсда келган йўловчилар, у билан муомала қилган одамлар - меҳмонхона ходимлари, таксичилар ва бошқалар ҳақидаги маълумотлар тўпланмоқда.

Янги вирусдан зарарланганлар сони аллақачон 2003 йили 25дан ортиқ давлатга тарқалган атипик пневмония (SARS) туфайли юзага келган эпидемия вақтида зарарланганлар сонидан ортиб кетган. Аммо ўлим ҳолатлари нисбатан кам.

Шу билан биргаликда, Ҳонгконг университетидаги эпидемиологлар вирусни юқтирганларнинг асл сони расмий статистикадан фарқ қилиши мумкинлигини айтишмоқда. Уларнинг фикрича, Уханда 75 мингдан ортиқ киши мазкур вирусдан зарарланган бўлиши мумкин.

Ҳонгконгдаги шифохоналар ходимлари беш кунлик иш ташлашди, улар ҳукумат Хитой билан чегарани вақтинча ёпишини талаб қилишмоқда. Ҳозирча Ҳонгконг ҳукумати бундай чора қўлламади ва ЖССТ тавсияларига амал қилмоқда.

Хитойда бўлганлар учун тақиқлар

Шри-Ланка ҳукумати Ухандан эвакуация учун юборган самолёт экипажи

Хитой ҳудудидан келган хитойликлар ва бошқа давлатлар фуқаролари бўлган йўловчилар учун мамлакатга киришни ёпаётган давлатлар сони ўсмоқда.

Дастлаб бундай чоралар Австралия томонидан қўлланганди. Бу давлат Хитойнинг Хубэй провинциясидан келаётган ўз фуқароларини 14 кун давомида назорат қилиш учун махсус карантин ҳудудга жойлаштирди. Хитойнинг бошқа ҳудудларидан келаётганлар ҳам 2 ҳафта давомида махсус назоратда бўлади.

Ухандан Индонезияга келганлар самолёт трапидаёқ дезинфекция қилинмоқда

Жаҳоннинг жами 23 давлатида, жумладан АҚШ, Буюк Британия, Германия, Испания, Италия ва Россияда ҳам вирус аниқланган. АҚШ ҳукумати соғлиқни сақлаш соҳасида фавқулодда ҳолат эълон қилган. Бундай ҳолат камдан-кам жорий этилади. Унга кўра, сўнгги икки ҳафта ичида Хитой ҳудудида бўлганлар мамлакатга киритилмайди.

Пентагон ўз ҳудудида карантинга жойлаштириладиган минг киши учун жой ажратган - Калифорния, Колорадо ва Техасдаги 4та базада 250 нафардан одам учун жой ҳозирланган.

Россия бир неча кун аввал Хитой билан чегараларини ёпган, шунингдек Хитой учун визасиз режим бекор қилинган, авиаалоқаларга жиддий чекловлар ўрнатилган, бу мамлакатга доимий рейсларни фақатгина «Аэрофлот» авиакомпанияси сақлаб қолган. 

Янги Зеландия, Покистон, Италия, Сингапур ва Жанубий Корея ҳам Хитойдан келувчилар учун тақиқлар ўрнатган.

Ухандан эвакуация қилинган британияликлар карантин ҳудудига олиб кетилмоқда

Аммо ҳозирча Жаҳон соғлиқни сақлаш ташкилоти бундай чораларни тавсия қилмайди. «Ҳаракатланишга чекловлар ўрнатилиши фойдадан кўра кўпроқ зарар келтириши мумкин, маълумот алмашиш, тиббий жиҳозлар ва дори-дармон етказиб бериш ҳам қийинлашади, булар иқтисодий зарар келтиради», деган ЖССТ раҳбари жума кунги баёнотида.

ЖССТдагиларнинг ҳисоблашича, аэропортлар ва денгиз портларида кириб келувчиларни жиддий текшириш керак, аммо чегараларни ёпиш самарали бўлмайди. Ташкилот чегаралар ёпилиши инфекция тарқалишини тезлаштириши мумкинлиги, одамлар ноқонуний йўллар орқали чегараларни кесиб ўтишни бошлаши ва бу назоратсиз қолишидан огоҳлантирди.

Финляндия шимолидаги Лапландияда ҳам одамлар коронавирус юқтиришдан хавфсирамоқда

Пекин ҳам қатъий чекловларни қоралаган, бошқа давлатларни ЖССТ тавсияларига риоя қилмасликда айблаган. «ЖССТ бундай чекловлар киритишдан тийилишга чақирган маҳалда, АҚШ қарама-қарши йўналишда ҳаракатланмоқда. Биз буни яхши ният йўлидаги қарор деб атай олмаймиз», деди Хитой ташқи ишлар вазирлиги расмийси.

Хитой қандай чоралар кўрмоқда?

Вирус ўчоғи бўлган, 11 миллион киши яшайдиган Ухань шаҳри ва Хитойнинг бошқа шаҳарлари карантин ҳолатида қолмоқда - кириш ва чиқиш маълум вақтга ёпилган. Мамлакатнинг кўплаб ҳудудларида ҳаёт учун зарур бўлган маҳсулотлар савдоси билан шуғулланмайдиган дўконлар ва тадбиркорлик муассасалари ёпилган.

Ухань арвоҳ шаҳарга айланган

Ухандан шарқда жойлашган, олти миллион киши истиқомат қиладиган Хуанган шаҳри мэри яқин кунларда шаҳарда вирусдан касалланганлар сони ортиши мумкинлигидан огоҳлантирди, Ухань ёпилишидан олдин бу шаҳарда хуанганликларнинг 700 минг нафари бўлиб қайтган.

Хуанган ва яна бир шаҳар - Вэньчжоу ўз аҳолиси учун қатъий чекловлар ўрнатган: оиланинг фақат бир аъзоси бир кунда икки марта овқат ва ҳаёт учун зарур бўлган бошқа маҳсулотлар сотиб олиш учун уйдан чиқиши мумкин.

Хубэй провинцияси янги йил таътилларини 13 февралгача узайтирган. Ой тақвими бўйича Хитой янги йили 25 январь куни бошланганди. Никоҳдан ўтиш каби оммавий тадбирларга тақиқ қўйилган.

Дунёда яна қандай чоралар кўрилмоқда?

  • Ҳиндистон Ухандан 300 нафар фуқаросини эвакуация қилди. Германия - юз нафарга яқин. Таиланд ва Россия ҳам шу кунларда кетишни истаган фуқароларини олиб кетмоқчи.
  • Хитой Европа Иттифоқидан бу ҳудуддаги давлатлардан дори-дармонни етказиб беришни соддалаштиришни сўраган.
  • Vietnam Airlines авиакомпанияси Хитой, Ҳонгконг ва Тайванга барча парвозларни бекор қилган. Австралиянинг Qantas авиакомпанияси, Air New Zealand, Air Canada ва British Airways авиакомпаниялари Хитойга рейсларни кескин қисқартирган ёки бутунлай бекор қилган.
  • Хитойдаги йирик меҳмонхоналар тармоқлари, жумладан, Hyatt, Radisson ва Hilton Хитойга келишни режалаштирган лекин режалари барбод бўлган сайёҳларнинг буюртмаларини бекор қилиш тартибини соддалаштиришни сўраган.
  • Apple компанияси Хитойдаги дўконларини вақтинчаликка ёпган.
  • Буюк Британия ҳукумати Хитой ҳудудидаги дипломатик миссиялари ходимларини чақириб олмоқчи.
Мавзу
Хитой коронавируси
2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.
Барчаси
Ушбу хабарга фикрингизни билдиринг. Бунинг учун авторизациядан ўтишингиз керак!
Top