Yaponiyadagi laynerda karantin muddati tugamoqda, Xitoyda 60 mln kishi karantinda. So‘nggi ma'lumotlar

17 fevral kuni AQSh ushbu layner bortida bo‘lgan fuqarolarini evakuatsiya qilishga kirishdi. Kema bortida bo‘lgan amerikaliklarning 328 nafari Tokiodan ikki reys orqali AQShga yuborildi, avvalroq 40 kishi Yaponiyadagi shifoxonalarga joylashtirilgandi - ularda COVID-19 infeksiyasi aniqlangan. AQSh Davlat departamenti ma'lumotiga ko‘ra, AQShga olib ketilganlar orasida 14 kishida ham so‘nggi 2-3 kun mobaynida koronavirus aniqlangan, ular Kaliforniyadagi bazada 14 kun davomida karantin holatida bo‘lishadi.

Japan Times nashri ma'lumotiga ko‘ra bir qancha amerikaliklar laynerni tark etishni istamagan. CNN xabariga ko‘ra, ular qariyb ikki haftalik karantindan keyin yana yangi karantinga joylashtirilishlaridan norozi bo‘lishgan. «Bu hech bir ayb qilmasdan qamoqda o‘tirishga o‘xshaydi», — degan yo‘lovchilardan biri Keri Mensikalko. 17 fevral kungi reyslarda AQShga uchishni istamaganlar, uyga qaytishdan oldin Yaponiyada yana ikki hafta o‘tkazishi kerak bo‘ladi.

Avstraliya hukumati «Daymond Prinsess»dan 209 nafar fuqarosini evakuatsiya qilishni rejalashtirgan, ularning hech birida koronavirus infeksiyasi aniqlanmagan. Evakuatsiya 19 fevral kuni, kruiz laynerda ikki haftalik karantin muddati tugagach boshlanadi. Avstraliyaga qaytarilgach bu odamlar yana karantinga joylashtiriladi. «Daymond Prinsess» bortidagi avstraliyaliklarning 150 nafari 60 yoshdan katta kishilardir. Isroil va Kanada ham laynerdagi fuqarolarini evakuatsiya qilmoqchi.

Bortda Buyuk Britaniyaning ham 78 fuqarosi bor, ammo hozircha ularning evakuatsiya qilinishi to‘g‘risida xabar qilinmagan. Kruiz laynerdagi britaniyaliklar hukumat ulardan voz kechgan deb hisoblashmoqda. Bu yo‘lovchilar hukumatni AQShdan o‘rnak olgan holda evakuatsiya jarayonini boshlashga chaqirishmoqda. Buyuk Britaniya Tashqi ishlar vazirligi vakili evakuatsiya haqidagi savolga javob bera turib, amaldorlar «bortdagi britaniyaliklar sog‘ligi uchun kun-u tun ishlashayotgani» haqida aytgan. The Telegraph nashrida yozilishicha, britanlar vatanga qaytish o‘rniga yana Yaponiya hududida karantin holatida qoldirilishi mumkin.

Rossiya Federatsiyasi Tashqi ishlar vazirligi kema bortida 24 nafar rossiyalik borligi va kemadagi karantin muddati yakunlanganidan keyingina evakuatsiya masalasi muhokama qilinishini bildirgan. Rossiyaning Yaponiyadagi elchixonasi ma'lumotiga ko‘ra, kemadagi rossiyaliklardan biri koronavirus yuqtirib olgani aniqlangan. Qayd etilishicha, bu ayol shifoxonaga yotqiziladi va davolanish jarayonini o‘taydi.

Peterburgda 7 fevral kuni koronavirus bo‘yicha karantindan qochib ketgan ayol - 32 yoshli Alla Ilina sud qaroridan keyin majburiy ravishda kasalxonaga yotqizildi.

So‘nggi ma'lumotlar
Xitoy hukumati Covid-19 epidemiyasi o‘chog‘i bo‘lgan Xubey provinsiyasida karantin tartiblarini qat'iylashtirgan. 60 million kishiga uyidan chiqish taqiqlangan.

16 fevral kuni Xitoyda koronavirus yuqtirganlarning yana 107 nafari halok bo‘ldi, shanba kuni 139ta o‘lim holati qayd etilgandi. Mamlakatda epidemiya boshlanganidan buyon halok bo‘lganlar soni 1771 nafarga yetgan. 

Butun dunyo bo‘ylab virusdan zararlanganlar soni 70 ming 620 nafarni tashkil qilmoqda. 10 mingga yaqin kishi kasallikni yengib o‘tib, tuzalishga muvaffaq bo‘lgan.

Hukumat virusdan zararlanish holatlari va o‘limlar soni pasaya boshlaganini ma'lum qilgan - virus tarqalishi nazoratga olingan.

Uxandagi «Leyshenshan» kasalxonasi bosh shifokori Van Sunxuan Xitoyda koronavirus epidemiyasi chekinayotganini aytgan.

«Koronavirusga qarshi kurashda burilish davri allaqachon keldi. Kasallikka chalinganlarning statistik ma'lumotlariga kelsak, ro‘yxatga olingan aksariyat kasallanishlar esa avval aniqlangan holatlarga tegishlidir. Isitmasi chiqqan bemorlar soni, mening kuzatishlarimga ko‘ra, ketma-ket beshinchi kun kamaymoqda», degan u.

Virus Xitoydan tashqari dunyoning 26 davlatida aniqlangan.

Xubeyda nimalar bo‘lmoqda?

Xubeyda ayni paytdagi tartiblarga ko‘ra, bir oilaning faqat bir a'zosiga uch kunda bir marta zarur narsalar - oziq-ovqat, dori-darmon va gigiyena vositalari xaridi uydan chiqishga ruxsat berilgan. Ko‘p qavatli binolarda yashovchi odamlar nazorat-o‘tkazuv punktlaridan o‘tishi kerak.

Dorixonalar, mehmonxonalar, oziq-ovqat do‘konlari va poliklinikalardan tashqari barcha korxonalar va kompaniyalar yopilgan. Sotuvchilar va mijozlar qat'iy tartibda haroratini o‘lchatishadi.

Noma'lum muddatga xususiy transport vositalari, jumladan avtomobillar, mototsikllar va velosipedlardan foydalanish taqiqlangan. Yo‘lda faqat xizmat mashinasi va  avto shoshilinch xizmatlar mashinalari - tez tibbiy yordam, o‘t o‘chirish mashinalari hamda yashash uchun birlamchi vositalarni tashuvchi mashinalar harakatiga ruxsat etilgan.

Uxanga qo‘shni bo‘lgan va 5 million aholisi bor Syaogan shahrida ham odamlarga o‘z uylarini tark etish taqiqlangan. Bu shaharda odamlarga yashash uchun birinchi navbatda kerak bo‘ladigan mahsulotlar uygacha yetkazib berilmoqda. Hukumat bu tartibni buzganlarni 10 kunga qamash haqida ogohlantirgan.

Pekinda shaharga tashqaridan kelganlarning barchasini ikki haftalik karantinga majburiy joylashtirish to‘g‘risida farmoyish chiqarilgan. Bunga amal qilmaganlar jazolanishi mumkin.

Virusga qarshi vaksina
16 fevral kuni Chjetszyan provinsiyasida koronavirusga qarshi kurashda samarali bo‘lishi mumkin bo‘lgan birinchi dori vositasi ishlab chiqarila boshlandi. 

Zhejiang Hisun Pharmaceutical farmatsevtika kompaniya hukumatdan koronavirusga qarshi «Favipiravir» potensial dori vositasini sotishni boshlash bo‘yicha ruxsat oldi. Dori sotuvga chiqqach, kompaniya uni klinik sinovdan o‘tkazishni davom ettirishi kerak bo‘ladi.

Xitoyning biotexnologik ishlanmalar milliy markazi direktori Chjan Sinmin bir nechta dorilar, jumladan, Remdesivir (remdesivir), Yaponiyaning Favipiravir (Favipivavir) dori vositalari koronavirusni davolashda yuqori samara namoyish qilganini ta'kidlab o‘tgan. Shuningdek, mutaxassis Xitoy koronavirusdan vaksina ishlab chiqilishini tezlashtirish uchun turli texnologik yondashuvlar qo‘llayotgani, bir qator vaksinalar esa hayvonlarda sinalishi boshlanganini qo‘shimcha qilib o‘tgan.

Avvalroq Jahon sog‘liqni saqlash tashkiloti bosh ijrochi direktori Sumiya Svaminatan COVID-19 koronavirusiga qarshi vaksinalarni insonda sinovdan o‘tkazish to‘rt-besh oydan so‘ng boshlanishini ma'lum qilgandi. Xitoyning AQShdagi elchisi esa koronavirusning harbiy ixtirolarga bog‘liqligini rad etgan edi.

Biznes qanday zarar ko‘rmoqda?
Xitoy markaziy banki naqd puldan foydalanuvchilar xavfsizligini oshirish maqsadida muomalaga yangi banknotalarda 600 mlrd yuan chiqargan va qo‘llanishda bo‘lgan pullar dezinfeksiya qilinib, 7 kundan 14 kungacha karantinga qo‘yilmoqda.

Koronavirusning biznesga ta'siri Yaponiya va Singapur kabi davlatlar iqtisodiyotida ham aks etmoqda. Bu epidemiya turistlar va yetkazmalar oqimiga jiddiy ta'sir ko‘rsatgani bilan bog‘liq.

Xitoy yangi yili bayramidan keyin barcha ishga qaytishi kerak edi, ammo epidemiya tufayli korxonalar huvillab qoldi - smartfonlar ishlab chiqarishdan tortib avtomobillarga ehtiyot qismlar tayyorlanadigan zavodlargacha.

Hongkongda vahima
Hongkong shahrida koronavirus tufayli birlamchi ehtiyoj mahsulotlarining yetishmasligidan vahimaga tushgan qurollangan bosqinchilar qiymati 1695 Hongkong dollari (218 AQSh dollari)ga teng bo‘lgan hojatxona qog‘ozlarini o‘g‘irlab ketdi.

Politsiya ma'lumotiga ko‘ra, pichoqlar bilan qurollangan uch talonchi Vonkok tumani hududida Wellcome supermarketi oldida tanqis hojatxona yetkazib beruvchini tunashgan.

Huquq-tartibot organlari xodimlari jinoyatni «issiq izi»dan fosh etishgan va ikki kishini qo‘lga olishgan, ulardan yo‘qolgan hojatxona qog‘ozlarining bir qismi musodara qilingan.

Apple Daily nashri xabariga ko‘ra, jinoyatchilar jami 600 o‘ram qog‘ozni o‘g‘irlashgandi.

Shahardagi do‘konlarda ushbu mahsulot tanqisligi yuzaga kelgan, hojatxona qog‘ozining yangi partiyasi kelgan vaqtda do‘konlar oldida uzun navbatlar hosil bo‘lmoqda.

Mahalliy hukumat aholini epidemiya hojatxona qog‘ozini yetkazib berishga ta'sir ko‘rsatmasligiga ishontirishga urinmoqda, Hongkong Iste'molchilar kengashi bosh direktori ham nam iqlim sharoitida mog‘orlab ketishi mumkinligi sababli mahalliy aholiga hojatxona qog‘ozini juda ko‘p sotib olmaslikni va uyida juda ko‘p miqdorda saqlamaslikni tavsiya etgan, ammo odamlar baribir bu mahsulotni g‘amlab qo‘yishni ma'qul ko‘rishmoqda.

Odamlar guruch, makaron mahsulotlari va tozalash vositalarini ham ulgurji sotib olishga kirishgan.

Ayni vaqtda shahardagi do‘konlarda yuz uchun himoya niqoblari va dezinfeksiya vositalarini topib bo‘lmaydi.

Hongkongdan tashqari Singapurda ham hojatxona qog‘ozlari, tozalash vositalari va yuz uchun tibbiy niqoblar ko‘tarasiga sotib olinishi oqibatida mahsulotlar taqchilligi kuzatilmoqda. Bu mamlakatda koronavirusdan zararlanish bilan bog‘liq 75ta holat qayd etilgan.