19:26 / 23.02.2020
0
32858
Коронавирус Европага тарқалмоқда, Италия шаҳарлари карантинда. Сўнгги маълумотлар

Европада коронавируснинг энг жиддий авж олиш ҳолати кузатилаётган Италия давлати инфекция тарқалишининг олдини олиш учун фавқулодда чораларни жорий этди: мамлакатда касалланганлар сони аллақачон 100дан ошган.

Падуя яқинидаги Скьявони шифохонаси олдида навбатчилик қилаётган полициячилар / EPA

Ломбардиянинг шимолий минтақасида бу вирусга 89 нафар киши йўлиққан, бу ҳақида якшанба куни провинция губернатори Аттилио Фонтана хабар қилди. Шундай қилиб, ҳозирги кунга қадар Италия бўйлаб юздан ортиқ зарарланиш ҳолати тўлиқ тасдиқланган. Сўнгги маълумотларга кўра, мамлакат бўйлаб жами 132 киши вирус юқтирган ва уларнинг 26 нафари оғир аҳволда қолмоқда.

Италиянинг икки фуқароси шанба куни бу хасталикдан вафот этганидан сўнг мамлакат бош вазири Жузеппе Конте янги чора-тадбирлар кўрилишини эълон қилди.

Коронавирус келтириб чиқарган касалликдан  вафот этган икки италияликдан бири бўлган 78 ёшли эркак Венето шаҳрида яшарди ва унинг ташхиси аниқ бўлган. Иккинчи ҳолат Ломбардияда 77 ёшли аёл билан рўй берган, аммо унинг вирус юқтириб олгани мурдани ёриб кўришдан сўнг аён бўлган.

Ушбу икки шимолий вилоятнинг бир неча ўнлаб шаҳарлари ҳозирда карантинда. 50 мингга яқин маҳаллий аҳоли вакиллари расмийлардан уйда ўтириш ҳақида фармойиш олган.

Миланда одамлар кўчага тиббий ниқобларда чиқа бошлади / EPA

Бош вазирнинг тушунтиришича, энди махсус рухсатсиз янги вирус аниқланган ҳудудга кириш ёки ундан чиқиш тақиқланган. Ушбу ҳудудда барча мактаб машғулотлари ҳамда спорт тадбирлари, шу жумладан якшанба куни бўлиб ўтиши режалаштирилган футбол бўйича Италия чемпионати ўйинлари бекор қилинди. 

Коронавирус Миландаги «Ла Скала» театридаги барча спектакллар бекор қилинишига ҳам сабаб бўлди. «Брера» музейи ҳам номаълум муддатга ёпилган.

Венецияда эса ҳар йилги Венеция карнавали бекор қилинди. Фақат якшанба кунга мўлжалланган маросимлар бўлиб ўтди. Шунингдек, март ойига қадар шаҳардаги бошқа тадбирлар ҳам бекор қилинган.

Карантин чораларига риоя қилинишини назорат қилиш учун полиция масъул қилинган, зарур ҳолларда армия ёрдамга чақирилиши мумкин. 

Жузеппе Конте коронавирус масаласида йиғилиш ўтказмоқда / EPA

Италия расмийлари ушбу вирус аллақачон ёпилган Ломбардия ва Венето ўчоқларидан чиқиб кетган бўлиши эҳтимолидан хавотирда, агар шундай бўлса унинг тарқалишига қарши курашиш оғирлашади. 

«Бу вируснинг юқиш даражаси жуда юқори,  у жуда кучли», — таъкидлайди Ломбардия соғлиқни сақлаш бошқармаси бошлиғи Жулио Галлера. 

Ушбу касалликнинг Италияда қандай пайдо бўлгани ҳозирча номаълум — жиддий ёйилиш қайд этилган Осиё мамлакатларидан келган одамлар билан тўғридан-тўғри алоқа қилингани ўз тасдиғини топмаган. 

Коронавирус Милан мода ҳафталигида
Вирус тарқалиши Милан мода ҳафталигига таъсир кўрсатди: якшанба куни маҳаллий вақт билан соат 16.00га режалаштирилган Жоржио Армани коллекциясининг намойиши бўш залда бўлиб ўтади, чунки меҳмонлардан келмаслик сўралган. 

Арманининг Милан модалар ҳафталиги «онлайн» режимга ўтказилган / Reuters

Подиумдаги моделлар ҳаракати Armani бренди сайтларида, Facebook ва Instagram'да жонли равишда намойиш этилади. 

«Бу қарор айнан [Армани] меҳмонларининг хавфсизлигини инобатга олган ҳолда қабул қилинди, улар ўта гавжум жойларда боришга мажбур бўлмаслиги керак», — дейилади пресс-релизда.

Хитойдаги вазият
Янги коронавирус тарқалиши ўтган йилнинг охирида Хитойнинг Хубэй провинциясида бошланди ва ҳозирда ушбу вирус 28 мамлакатда тарқалди. Хитой ташқарисида касалланишнинг 1400та ҳолати ва 11та ўлим қайд этилди. 

Бу орада Хитой ҳукумати шанба куни ўлимлар сонининг камайгани ва вирус тарқалиши пасайгани ҳақида хабар берди. ХХРда вирус юқиши ҳолатлари аллақачон 77 мингга яқинлашди, 2442 киши вафот этган.

Аммо, бошқа мамлакатларда коронавирус билан касалланиш ҳолатлари кўпайишда давом этмоқда — бунинг хитойлик вирус ташувчилари билан алоқаси кўринмаётгани сабабли Жаҳон соғлиқни сақлаш ташкилоти ташвишга тушмоқда.

ЖССТ раҳбари Тедрос Гебрейесус таъкидлаганидек, бугунги кунда энг катта ташвишни соғлиқни сақлаш тизимлари яхши ривожланмаган мамлакатлар, айниқса Африка мамлакатлари туғдирмоқда.

Жанубий Кореядаги вирус ўчоғи
Жанубий Корея вирус тарқалиши бўйича Хитойдан ва 600дан ортиқ одам касалланган «Даймонд Принцесс» круиз кемасидан кейинги энг кенг тарқалиш ўчоғига айланди. 

Тэгудаги Covid-19 юқтирганлар олиб келинадиган шифохона ходими / AFP

Якшанба кунги маълумотларга кўра, Жанубий Кореянинг тўртинчи йирик шаҳри Тэгуда шаҳрида коронавируснинг 90та янги ҳолати қайд этилган ва Тэгу бўйича умумий ҳисобда 247 нафар киши инфекцияланган. 

Жанубий Кореяда коронавирусдан тўртинчи ўлим қайд этилди ва бу мамлакатдаги жами беморлар сони 556 кишига етди — бу бир кун аввалгига қараганда 100тага кўп. 
Уларнинг ярмидан кўпи қароргоҳи Тэгуда жойлашган «Синчонджи гувоҳлик ибодатхонаси» яширин диний сектаси ёки касалланганлар келган шифохона билан боғлиқ.

Коронавирус тарқалиши ўтмишдаги шу каби эпидемиялар билан таққослаганда

Бошқа мамлакатларда аҳвол қандай: 

  • Шанба куни «Даймонд Принцесс» круиз кемасида бўлган саккиз нафар россиялик ўз ватанларига қайтиб келишди, уларнинг уч нафарида инфекция аниқланган. Эвакуация қилинганларнинг барчаси, шунингдек эвакуация билан шуғулланган ходимлар 14 кун давомида Қозон шаҳридаги ихтисослаштирилган муассасада  карантинда бўлишади. 
  • «Даймонд Принцесс» круиз кемаси бортида бўлган 32 нафар британиялик ва Европанинг бошқа давлатлари фуқаролари Англиянинг шимоли-ғарбида карантинда сақланмоқда. 
  • Исроил Жанубий Кореядан учиб келган самолёт бортидаги 200 нафар чет эл фуқаросининг самолётдан тушишига рухсат бермади ва самолётни Сеулга қайтарди. Ушбу бортда бўлган Исроилнинг 12 нафар фуқароси карантинга олинган. 
  • Якшанба куни Эрон ўзининг 14 вилоятида мактаблар, университетлар ва маданий марказлар ёпилишини эълон қилди, янгиланган маълумотларга кўра, у ерда коронавирусдан саккизинчи ўлим қайд этилди ва вирусдан зарарланганларнинг жами сони 43 кишига етди.
Мавзу
Коронавирус
2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.
Барчаси
Ушбу хабарга фикрингизни билдиринг. Бунинг учун авторизациядан ўтишингиз керак!
Top