21:13 / 02.03.2020
0
13410
Ташқи меҳнат миграцияси агентлиги вакили: «Бизга фуқароларимиз Корея ҳудудида қолгани маъқул»

Ташқи меҳнат миграцияси агентлигининг Жанубий Кореядаги ваколатхонаси раҳбари Алишер Сулаймонов ушбу мамлакатдаги ўзбекистонликларнинг визалари узайтирилиши, фуқаролар Ўзбекистонга мажбуран қайтарилмаслиги, улар ўз хоҳишига кўра Кореяда қолиши барча учун фойдали бўлиши ҳақида гапирди.

Бугун, 2 март куни Жанубий Корея вақти билан соат 20:00дан Ўзбекистон Республикаси Бандлик ва меҳнат муносабатлари вазирлиги ҳузуридаги Ташқи меҳнат миграцияси агентлигининг Жанубий Кореядаги ваколатхонаси раҳбари Алишер Сулаймонов фейсбук ижтимой тармоғи орқали жонли эфирда Ўзбекистон фуқароларининг саволларига жавоб қайтарди.

Жанубий Кореядаги фуқаролар коронавирус муносабати билан чекланган авиақатновлар, визани узайтириш ва Кореяда авиачипталарни сотиб олиш бўйича саволлар йўллашди.

Сулаймонов Ўзбекистон келгусида Корея Республикаси ҳудудидаги фуқароларини эвакуация қилиши мумкинлигини истисно қилмади.

«Аввало, яхши ният қилайлик. Биз ушбу вазият тезроқ яхшиланишига умидвормиз. Бироқ вазият жиддий тус олса, Ўзбекистон ўз фуқароларини қайтариш учун албатта, барча керакли чора-тадбирларни амалга оширади.

Ҳеч кимни мажбуран Ўзбекистонга қайтариш учун чоралар кўрилмайди. Биз учун айни дамда фуқароларимиз Корея ҳудудида бўлгани мақсадга мувофиқ», деди у.

У шунингдек, Жанубий Кореядаги ўзбекистонликларнинг визалари муддати узайтирилишини маълум қилди.

«Албатта, hikorea.go.kr сайти орқали визангизни ҳозирги ҳолатини текширасиз. Одатда, Корея ҳукумати томонидан 30 апрелга қадар чўздирилган бўлиши керак. Е9 ва Е10 виза турлари бундан, мустасно. Агар чўздирилмаган бўлса, у ҳолда hikorea.go.kr сайтида рўйхатдан ўтиб, иммиграция хизмати идорасига бориб, визани узайтириш учун ариза тўлдирасиз. Аризада узайтириш учун асосий сабаблар кўрсатилиши керак. Биз визани узайтириш тартиби ҳақида яна батафсил маълумот ва кўрсатмалар берамиз», деган у.

Мутасадди апрель ойида авиақатновлар чекланмаслигига умид қилишини билдирган. 

У шунингдек, март ойидаги рейсларга чипта олганлар чиптасини қайтариши эвазига чипта учун сарфланган пуллар тўланиши шартлигини қўшимча қилган.

Kun.uz мухбири хабар қилишича, ваколатхона 3 март куни ҳам шундай жонли мулоқотни ташкил этишни режалаштирган.

1 мартдан авиақатновлар сони қисқартирилиб, ҳар ҳафтада бир марта паритет асосида парвозлар галма-гал амалга қуйидаги тартибда оширилади:

  • 2020 йил 8 март куни – «Uzbekistan Airways» авиакомпанияси томонидан;
  • 2020 йил 15 март куни – Корея Республикаси авиакомпаниялари томонидан;
  • 2020 йил 22 март куни – Uzbekistan Airways авиакомпанияси томонидан;
  • 2020 йил 29 март куни – Корея Республикаси авиакомпаниялари томонидан.
Мавзу
Коронавирус
2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.
Барчаси
Ушбу хабарга фикрингизни билдиринг. Бунинг учун авторизациядан ўтишингиз керак!
Top