Noqonuniy qurilgan, lekin kadastr hujjati bor uylar qonuniylashtirib berilmaydi – «Yergeodezkadastr»

Bu bo‘yicha Oliy Majlis Qonunchilik palatasi spikeri Nurdinjon Ismoilov 10 mart kuni «Hukumat soati»da Yer resurslari, geodeziya, kartografiya va davlat kadastri davlat qo‘mitasi raisi Abdushukur Abdullayevdan izoh so‘radi.

«To‘g‘ri, ayrim uylar noqonuniy qurilgan bo‘lishiga qaramasdan, kadastr hujjatlari qilib berilgan holatlar ham mavjud. Bunga ko‘z yumolmaymiz. Besh qo‘l barobar emas, turli odamlar bo‘ladi. Korrupsiyaga yo‘l qo‘yilgan yoki e'tiborsizlik qilingan holatlar ham bo‘lgan.

«Ma'muriy tartib-taomillar to‘g‘risida»gi qonunning 12-moddasida keltirilgan normaga ko‘ra, agarda fuqaro hukumat yoki mutasaddi tashkilotning chiqargan qaroriga ishongan bo‘lsa, uning bu ishonchi qonun bilan himoyalanadi.

Shunga muvofiq, bunday holatlarda ularning [kadastr xodimlariga ishonib, keyinchalik jabrdiyda bo‘lib qolganlarning] huquqi qonun tomonidan himoya qilinadi», – dedi Abdushukur Abdullayev.

Nurdinjon Ismoilov kadastr xodimi uyini hujjatlashtirib bergan, shunga ishonib, «turarjoyim qonuniy» deb xotirjam yurgan odamlar yillar o‘tib kimlarningdir xatosini deb jabrdiyda bo‘lib qolganda qonun ularni qanday himoya qilishi bilan qiziqdi.

Qo‘mita raisiga ko‘ra, bunday muammoli vaziyatlarning har biri individual holatda o‘rganiladi. Lekin shunga qaramay, ularning noqonuniy qurilgan uylari qonuniylashtirib berilmaydi.

«Har bitta bunday holat individual tarzda o‘rganiladi. Masalan, noqonuniy qurilgan, ammo kadastr hujjati bor uy-joy buziladigan bo‘lsa, kompensatsiya pulini unga turarjoyini hujjatlashtirib bergan idora to‘laydi. Bu narsa qonunda bor», dedi Abdushukur Abdullayev.

Uning ma'lum qilishicha, shu paytgacha kadastr xodimi xatosi bilan jabrdiyda bo‘lib qolgan birorta fuqaroga qo‘mita tomonidan hech qanday kompensatsiya to‘lanmagan.