Tailand O‘zbekiston uchun mamlakatga kelgandan keyin rasmiylashtiriladigan vizani bekor qildi 

Bu haqda 11 mart kuni Tailand ichki ishlar vaziri ma'lum qildi, deb xabar berdi Reuters axborot agentligi.    

O‘zbekiston tashqi ishlar vazirligi ma'lumotlariga ko‘ra, O‘zbekiston 2010 yil 23 apreldan fuqarolariga Tailandga kirish vizasi mamlakatga kelgach bevosita Tailandga kirish xalqaro punktlarida (24 ta aeroport va 2 ta chegara o‘tkazish punkti) rasmiylashtiriladigan davlatlar ro‘yxatiga kiritilgan. Viza 15 kunlik muddatga rasmiylashtirilgan. 

Tailand O‘zbekistondan tashqari yana 17 ta davlatga ushbu vizani bekor qilgan, bular: Bolgariya, Butan, Xitoy (jumladan Tayvan), Kipr, Efiopiya, Fiji, Gruziya, Hindiston, Qozog‘iston, Malta, Meksika, Nauru, Papua-Yangi Gvineya, Ruminiya, Rossiya, Saudiya Arabistoni va Vanuatu.

Ta'kidlanishicha, endilikda ro‘yxatga kiritilgan davlatlar fuqarolari Tailandga viza olish uchun Tailandning o‘z davlatlaridagi elchixona yoki konsulxonalariga rejalashtirilayotgan safardan oldinroq murojaat qilishlari kerak bo‘ladi.

Shuningdek, Janubiy Koreya, Italiya va Hongkong fuqarolari ham Tailandga viza ololmaydilar. 

Hozircha ushbu cheklovlar qachongacha amal qilishi noma'lum.

11 mart holatiga ko‘ra, Tailandda koronavirusga chalinganlar soni 59 nafarni tashkil qilmoqda.