Qozog‘istonda koronavirus epidemiyasi sababli Navro‘z tantanalari va G‘alaba paradi bekor qilindi

Bu haqda Qozog‘iston prezidenti matbuot kotibi Berik Kurmangali Facebook’da ma'lum qildi.

Ta'kidlanishicha, bunday qarorni prezident Qosim-Jo‘mart To‘qayev qabul qilgan.

Rejalar orasida To‘qayevning Ikkinchi jahon urushidagi g‘alabaning 75 yilligi munosabati bilan Moskvadagi Qizil maydonga tashrif buyurishi ham bo‘lgan. Bu borada biror o‘zgarish bo‘lgani hozircha ma'lum qilinmagan. 

Avvalroq Qozog‘iston hukumati koronavirus tarqalishi xavfi sababli 13 martdan respublikada barcha ommaviy madaniy va sport tadbirlarini bekor qilishga, qariyalar uylariga tashrif buyurishni taqiqlashga, o‘quvchilarni muddatdan oldin ta'tilga chiqarishga, Yevropa, Turkiya va BAA bilan aviaaloqani cheklashga qaror qildi.

Shuningdek, qozog‘istonliklarga to‘ylar va tug‘ilgan kunlarni nishonlashni keyinroqqa ko‘chirish tavsiya qilingan. 

“Barcha qozog‘istonliklarga murojaat qilmoqchiman. To‘ylar, tug‘ilgan kunlar, bayramlar – juda muhim voqealardir, biroq sog‘liq masalasi muhimroqdir. Bunday tadbirni o‘tkazmoqchi bo‘lganlar yaxshilab o‘ylab ko‘rsinlar. Ayniqsa bizda ko‘p kishilik to‘ylar o‘tkazishni yaxshi ko‘rishadi”, deb murojaat qilgan qozog‘istonliklarga bosh vazir o‘rinbosari Yerali Tugjanov.

“Fikrimcha, mehmonlar sonini iloji boricha qisqartirish kerak. Biroq biz bunday tadbirlarning keyinroqqa ko‘chirilishini tavsiya qilamiz”, deb qo‘shimcha qilgan amaldor.

Ta'kidlab o‘tish joiz, hozircha respublikada koronavirus aniqlanmagan.