O‘zbekiston MDHning yana bir tuzilmasida to‘laqonli ishtirok etadigan bo‘ldi

O‘zbekiston Respublikasi Mustaqil Davlatlar Hamdo‘stligi davlatlari Sanoat xavfsizligi kengashining to‘laqonli a'zosi bo‘ldi. 2020 yil 6 fevral kuni Qirg‘iziston Tashqi ishlar vazirligi MDH Ijroiya qo‘mitasiga yo‘llagan maktubida, rasmiy Bishkek O‘zbekiston Respublikasining MDH davlat rahbarlari Kengashining 2001 yil 28 sentyabrdagi “MDHga a'zo davlatlar Sanoat xavfsizligi bo‘yicha vakolatli organ rahbarlarining muvofiqlashtiruvchi kengashi (MSPB SNG) to‘g‘risida”gi Moskva kelishuviga qo‘shilishiga roziligini bildirgan. 

Shu bilan, MDH Ijroiya qo‘mitasining ma'lum qilishicha, O‘zbekistonning mazkur tuzilmaga qo‘shilish jarayoni muvaffaqiyatli poyoniga yetgan. 

Eslatib o‘tamiz, O‘zbekiston Sanoat xavfsizligi davlat qo‘mitasi prezident qaroriga muvofiq, mazkur xalqaro hujjatlarga qo‘shilib, O‘zbekiston nomidan ish yuritishda mas'uliyatli idora hisoblanadi. 

Ma'lumot uchun: Mustaqil davlatlar hamdo‘stligi davlatlarining sanoat xavfsizligi kengashiga tarmoqlararo hamkorlik organi bo‘lib xavfli ishlab chiqarish obektlarida sodir bo‘lishi mumkin bo‘lgan avariya hamda baxsiz hodisalarning oldini olish harakatlarini muvofiqlashtirishni amalga oshiradi. Unga O‘zbekiston, Armaniston, Ozarboyjon, Belarus, Moldova, Rossiya, Qozog‘iston, Qirg‘iziston, Tojikiston va Ukraina davlatlarining maxsus vakolatli organlari rahbarlari kiradi.