Xorijdan olib kelinadigan fuqarolar Toshkent viloyatidagi sanatoriylarda karantinga joylashtiriladi - Vazir

Uning so‘zlariga ko‘ra, bugun Janubiy Koreyadan charter reys bilan O‘zbekistonning 250 nafar fuqarosi olib kelinadi. Ular Toshkent viloyatidagi «Energetik», «Bo‘ston» va «Chotqol» sanatoriylariga joylashtiriladi.

Shodmonov ular bemor emasligi, faqatgina boshqalar bilan muloqot qilmasligi uchun izolyatsiyada bo‘lishlarini ta'kidladi. Vazir karantindagilar uchun sanatoriyda barcha sharoitlar yaratilgani, tibbiyot xodimlari ularni kuzatib borishi, laborator tekshiruvlar o‘tkazilishi hamda 14 kundan so‘ng ularga javob berilishini bildirdi.

Eslatib o‘tamiz, bugun, 15 mart kuni Sanitariya-epidemiologik osoyishtalik agentligi O‘zbekistonda koronavirus bilan zararlangan ilk bemor aniqlangani to‘g‘risida ma'lumot berdi.

Koronavirus aniqlangan bemor, u bilan birga «Parij-Toshkent» reysi orqali uchib kelgan yo‘lovchilar, bemorning oila a'zolari, hamkasblari, u bilan kontaktda bo‘lganlar – 150ga yaqin kishi izolyatsiyaga olingan.

16 martdan O‘zbekistonning chet el davlatlari bilan avia va avtomobil qatnovlari to‘xtatiladi. Endilikda O‘zbekiston fuqarolarining chet davlatlarga chiqishi, chet davlat fuqarolarining O‘zbekistonga kirishi taqiqlanadi. Chet davlatlarda qolgan o‘zbekistonliklarning qaytishi uchun charter reyslar tashkil etilishi mumkin, xorijdan qaytarilganlarning barchasi karantinga joylashtiriladi.