19:57 / 18.03.2020
29028
Ўзбекистонда коронавирус кириб келганининг 4-куни: шаҳар кўчаларида осойиш, хайрия акциялари кенгаймоқда

Kun.uz сайти коронавирус карантини билан боғлиқ вазиятни изчиллик билан ёритиб бормоқда. Навбатдаги видеодастуримизда ҳам карантин кунларидаги Ўзбекистон ҳаёти билан таништиришда давом этамиз.

18 март, карантиннинг учинчи, вирус кириб келганининг тўртинчи кунидаги вазиятни ўрганарканмиз, ваҳималар анча камайгани, нисбатан осойишталик ҳукм сураётганини кузатишимиз мумкин.

Коронавирусга чалинганларнинг барчаси айни пайтда пойтахтда бўлиб тургани учун ҳам табиий равишда пойтахтга кўпроқ эътибор қаратамиз.

Тошкент кўчалари сокин, тирбандликлар анча камайган, йўллар бўшаб қолгани бир қарашдаёқ кўзга ташланади.

Жамоат транспорти, хусусан автобус ва метрода йўловчилар оз. Бу, албатта, талабаларнинг таътилга чиқарилгани, таълим тизими ходимларининг аксарияти ишга чиқмаётгани ва пойтахтга меҳмонлар келиши камайиши билан боғлиқ.

Талабаларнинг қайтиши билан боғлиқ муаммо кузатилгани, йўлкиралар ошиб кетгани ортидан бир қатор вилоятлар ҳокимликлари автобуслар ва бошқа турдаги транспортлар билан бепул ташишни йўлга қўйди.

Бу борада дастлаб Қашқадарё вилояти ташаббус кўрсатган бўлса, кейинчалик Жиззах, Андижон, Сурхондарё каби вилоятлар ҳам қўшилди. Нафақат ҳокимликлар, балки турли ташкилотлар, хусусий транспортлар эгалари ҳам бу ғояни қўллаб-қувватлагани қувонарли.

Умуман, бир нарсани таъкидлаш жоиз – коронавирус халқимизни жисмонан узоқлаштирган бўлса-да, маънан яқинлаштирди, жипслаштирди.

Буни уюштирилаётган турли хайрия ташаббусларда ҳам кузатишимиз мумкин.

Жумладан, айрим дорихоналар тиббий ниқобларни арзон нархда сотишни йўлга қўйган бўлсалар, яна бошқа тадбиркорлар бундай воситаларни ҳатто бепул тарқатмоқдалар. Шунингдек, исириқ, нон каби маҳсулотларни беғараз тарқатаётганларни, егуликларни арзонлаштириб сотаётганларни ҳам кузатиш мумкин.

Бундан ташқари, Beeline ва Mobiuz алоқа операторлари коронавирус ҳақида ишончли маълумот бериб келаётган сайтлар – Kun.uz ва бошқа қатор интернет нашрларга киришни ўз абонентлари учун бепул қилиб қўйди.

Аммо шундай бирдамлик кунларида кўнгилни хира қиладиган ҳолатлар ҳам учраб туради. Булар – кўп марта қайтарилганига қарамай, яна ёлғон маълумотлар тарқалишида яққол кўринади.

Масалан, кимдир шаҳарлар узра вертолётда дезинфекция воситалари сепилиши ҳақида асоссиз хабар берган бўлса, яна бир хорижий сайт Ўзбекистон Соғлиқни сақлаш вазирлигини манба сифатида кўрсатиб, юртимизда бир киши коронавирусдан ўлгани ҳақида ёлғон ахборот тарқатган.

Президент Шавкат Мирзиёев оила ва маҳалла масалаларига бағишланган йиғилишда коронавирус муаммосига атрофлича тўхталиб, халққа мурожаат қилди. Давлат раҳбати ўз мурожаатида турли миш-миш ва уйдирмаларни тарқатаётганларни қоралади.

«Шу муносабат билан жамоатчилигимиздан илтимос қиламан: саросима ёки ваҳима кайфиятига берилмаслик керак. Матбуот ва ижтимоий тармоқларда нотўғри, асосланмаган маълумотларни тарқатишга йўл қўймаслигимиз зарур. Бу масалани ҳуқуқ-тартибот идоралари ҳам алоҳида назоратга олиши лозим», – деди Шавкат Мирзиёев.

Эслатиб ўтамиз, 18 март ҳолатига 15 киши бу касалликка чалингани аниқланган бўлса-да, вафот этганлар йўқ. Соғлиқни сақлаш вазирлиги беморларнинг аҳволи қониқарли эканини маълум қилган.

Тошкент шаҳридан бошқа ҳудудларда бу касаллик қайд этилмаган.

Яна бир муҳим жиҳати – вирус юқтириб олганларнинг барчаси – четдан кирганлар ва улар билан контактда бўлганлардир. Яъни Ўзбекистонда коронавируснинг табиий ўчоғи йўқ.

Шу ўринда эслатиб ўтмоқчимиз, Kun.uz сайтида бу касаллик тарқалиши ва карантин билан боғлиқ энг кўп туғилаётган саволларга жавоб беришни кўзда тутувчи махсус рукн ташкил этилди. «Коронавирус» деб номланган рукнга кирсангиз, кўпчиликни қизиқтираётган қисқа саволларга лўнда жавоблар тақдим этилган.

Бизни кузатишда давом этинг. Гигиена қоидаларига риоя қилинг, бу ва бошқа касалликлар сизни, оила аъзоларингизни ва яқинларингизни четлаб ўтсин!

Аброр Зоҳидов, Раҳматилла Исроилов.
Тасвирчи – Муҳаммаджон Ғаниев.

Мавзу
Коронавирус Ўзбекистонда
15 март куни Ўзбекистонда коронавирусга чалинган илк бемор аниқланди.
Барчаси
Top