21:29 / 20.03.2020
196934
23 мартдан тўй ўтказиш тақиқланди. Умумий овқатланиш жойлари ҳам ёпилмоқда

Ўзбекистонда 23 мартдан тўй-ҳашамлар, оилавий тантаналар, маърака ва маросим сингари оммавий тадбирлар ўтказилиши бекор қилинади. Бош вазир матбуот хизматидаги манба Kun.uz’га хабар беришича, коронавируснинг кириб келиши ва тарқалиши олдини олиш юзасидан чора-тадбирлар дастурини тайёрлаш бўйича республика махсус комиссиясининг навбатдаги мажлисида шундай қарор қабул қилинган.

Фото: toylarmuborak.uz

«Мамлакатимиз ҳудудида беморлар ёки касалликка шубҳа қилинган шахсларни ўз вақтида аниқлаш ва республика бўйлаб касалликни тарқалишини олдини олиш мақсадида, шунингдек мажлисда кўрилган бошқа масалалар юзасидан республика махсус комиссияси йиғилишининг қарори қабул қилинди.

Қарорга кўра, 21 мартдан эътиборан барча ҳудудларда фаолият юритаётган мавжуд кўнгилочар объектлар, шу жумладан тунги клублар, дискотека, спа ва массаж салонлар, чойхона, ошхона (уйга элтиб бериш хизмати бундан мустасно) караоке, бильярд заллари, чилим (кальян) марказлари ва компьютер ўйинлари хизматини кўрсатувчи тадбиркорлик фаолияти турлари коронавирус касаллиги билан боғлиқ эпидемиологик ҳолат барқарорлашгунга қадар тўхтатилади.

Шунингдек, 23 мартдан бошлаб «Аҳолининг санитария-эпидемиологик осойишталиги тўғрисида»ги Қонунга мувофиқ мамлакат фуқароларини соғлиғини ҳимоя қилиш мақсадида тўй-ҳашамлар, оилавий тантаналар, маърака ва маросим сингари оммавий тадбирлар ўтказилиши бекор қилинади. Ушбу маросимларни зарур бўлган тақдирдагина ихчам ҳолда, яқинлари билан бирга 10-15 киши иштирокида ўтказиш тавсия этилади», дейилади маълумотда.

Мажлисда айни пайтда чет элларда бўлиб турган фуқароларни мамлакатимизга қисқа вақтлар ичида олиб келиш ва уларни белгиланган тартибда 14 кун карантинда сақлаш юзасидан кўрилаётган чоралар атрофлича муҳокама қилинди.

«Комиссиянинг бундай қарорга келишидан кўзлаган бирдан-бир мақсади шуки, халқимизнинг саломатлигини сақлаш, улар орасида янги турдаги CОVID-19 вирусининг тарқалиши олдини олишдир. Ишонаманки, бундай пайтда ҳар қандай орзу-ҳавасдан шу азиз Ватанга бўлган меҳримиз, бир-биримизга бўлган самимий муҳаббатимиз устун келади. Синовли кунларда янада ҳамжиҳат бўлсак, барча қийинчиликларни енгиб ўтамиз.

Сизлардан шундай пайтларда ўзингизни ва яқинларингиз соғлигига бефарқ бўлмай, бир-бирингизни қўллаб-қувватлашингизни, гигиена талабларига қатъий риоя қилишингизни яна бир бор илтимос қиламиз», дея ёзади Бош вазир матбуот хизмати ходими Бекзод Ҳидоятов.

Мавзу
Коронавирус Ўзбекистонда
15 март куни Ўзбекистонда коронавирусга чалинган илк бемор аниқланди.
Барчаси
Top