23:40 / 20.03.2020
87095
Британия нафақадаги шифокорларни ёрдамга чақирди, Ўзбекистонда янги чоралар. Сўнгги маълумотлар

Ўзбекистонда 20 март куни яна 10 кишида вирус аниқланди - аввалги беморлар билан алоқада бўлган 9 киши вирус юқтирган, шунингдек, хориждан келган бир ўзбекистонликда вирус аниқланган. Эндиликда Ўзбекистонда вирус беморлари 33 нафарга етди.

Соғлиқни сақлаш вазирлиги маълумотига кўра, коронавирус касалига чалингани аниқланган сўнгги беморларнинг аҳволи ўрта оғир ва барқарор даражада. Шу билан биргаликда, ушбу касалликка чалинган илк беморлар соғайиб бормоқда.

Коронавирусга чалинган беморларга тун-у кун хизмат кўрсатаётганлар — Вирусология илмий текшириш институти клиникаси жамоаси

Бугун мамлакатдаги масжидларда коронавирус туфайли жума ва жамоат намозлари ўқилмади.

Президент Шавкат Мирзиёев хитойлик мутахассисларни махсус рейс билан Ўзбекистонга олиб келиб, профилактика тадбирлари бўйича маслаҳат ва кўмак олиб бўйича топшириқ берган.

Коронавируснинг кириб келиши ва тарқалишини олдини олиш юзасидан чора-тадбирлар дастурини тайёрлаш бўйича республика махсус комиссиясининг навбатдаги мажлиси қарорига мувофиқ, барча ҳудудларда 21 мартдан бошлаб, бир қатор объектлар ва хизматлар фаолияти тўхтатилмоқда. 

Хусусан: 

  • кўнгилочар объектлар (шу жумладан, тунги клублар, дискотека);
  • спа ва массаж салонлар;
  • чойхона ва ошхоналар (уйга элтиб бериш хизмати бундан мустасно);
  • караоке, бильярд заллари, чилим (кальян) марказлари; 
  • компьютер ўйинлари хизматини кўрсатувчи тадбиркорлик фаолияти турлари. 

Шунингдек, 23 мартдан бошлаб, тўй-ҳашамлар, оилавий тантаналар, маърака ва маросим сингари оммавий тадбирлар ўтказилиши бекор қилинади. Ушбу маросимларни зарур бўлган тақдирдагина ихчам ҳолда, яқинлари билан бирга 10-15 киши иштирокида ўтказиш тавсия этилади.

Президент Республика махсус комиссиясига хориждаги фуқароларни мамлакатга қайтариш бўйича авиарейсларни ташкиллаштиришга кўрсатма берди. 

Комиссия Ўзбекистонга парвоз қиладиган қуйидаги чартер рейслар жадвалини тузиб чиқди:

  • 21 март куни Москва шаҳридан (Россия) соат 03:30да; Деҳли шаҳридан (Ҳиндистон) соат 17:30да;
  • 22 март куни Куала-Лумпур шаҳридан (Малайзия) соат 04.30да; Москва шаҳридан (Россия) соат 05:00да; Истанбул шаҳридан (Туркия) соат 06:00да ва Новосибирск шаҳридан (вақти аниқлаштирилмоқда);
  • 23 март куни Сеул шаҳридан (Корея Республикаси) соат 02:00да;
  • 24 март куни Джакарта шаҳридан (Индонезия) соат 07:00да;
  • 26 март куни Бангкок шаҳридан (Тайланд) соат 01:00да. 
  • Бошқа мамлакатлардан фуқароларни қайтариш давом этади.

Ўзбекистонга қайтган фуқаролар Жаҳон соғлиқни сақлаш ташкилоти талабларига кўра 14 кунлик карантинга жойлаштирилади.

Россиядаги вазият

Россияда бир кунда коронавирусдан зарарланишнинг зарарланиш билан боғлиқ 54та янги ҳолат қайд этилди. Шу тариқа, мамлакатда коронавируснинг жами беморлари сони 253 нафарга етди.

Москва области ҳудудида коронавирусга чалинган беморлар учун янги инфекцион шифохона қурилиши ишлари давом этмоқда.
Шифохона 500 ўринга мўлжалланган бўлади. Фото: Zuma/ТАСС

Янги инфекцияга қарши кураш бўйича оператив штаб маълумотларига кўра, Москвада яна 33 киши касалланган, Ёқутистонда 6 кишида вирус аниқланган. Шунингдек, Санкт-Петербург ва Самара областларида 4 нафар кишида, Киров ва Новосибирск областларида икки нафар киши вирусдан зарарланган. Москва, Ульянов ва Тюмен областларида ҳам биттадан ҳолат қайд этилган.

Беморларнинг барчаси махсус инфекцион боксларга жойлаштирилган.

Маълум қилинишича, беморларнинг барчаси сўнгги ҳафталарда хорижда бўлиб қайтишган. Москвадаги штаб маълумотига кўра, улар 29 февралдан 15 мартга қадар Женева, Милан, Ницца, Верона, Боку, Мюнхен ва Франкфуртдан амалга оширилган рейсларда келишган.

«Беморларнинг икки нафари вояга етмаган болалар, улардан бири Россияга келгач мактабга бормаган; иккинчиси 12 март кунидан мактабга боришни тўхтатган, айни вақтда унинг мактаби карантинга ёпилган», дея штаб баёнотини келтирмоқда «Интерфакс» агентлиги.

Бугундан Россиянинг бутун ҳудудида - 85та регионда юқори шайлик ҳолати режими амалга кирди. Мактаблар ва олий таълим муассасалари масофадан таълим беришга ўтган, барча спорт тадбирлари ва бошқа оммавий маросимлар бекор қилинган. Россияликларга хориж сафарларидан тийилиб туриш тавсия этилмоқда.

Россияга хориждан келганларнинг барчаси 19 март кунидан 14 кунлик карантинга жойлаштирилмоқда. Мамлакатга қайтувчиларнинг барчаси ўзининг қайтиши тўғрисида тегишли жойни хабардор қилиши керак.

18 март кунидан мамлакат ҳудудига хорижликлар кириши тақиқланди, бу тақиқ 1 майга қадар амалда бўлади. Шу куни Россиядан Буюк Британия, АҚШ ва БААга парвозлар ҳам тўхтатилди. Бунгача Европа Иттифоқи билан авиақатновларга чек қўйилганди.

Сўнгги бир кунда Россияда беморларнинг 7 нафари тузалди: уларнинг тўрт нафари Москвада, уч нафари Липецк областида.

Италия жуда кўп қурбон бермоқда

EPA

20 март куни Италияда коронавирусдан вафот этганлар сони яна 627 нафарга ошди ва жами қурбонлар сони 4032 нафарга етди. Бу Хитой ёки бошқа ҳар қандай давлатдаги ўлимлар сонидан кўпроқ. Сўнгги бир кунда яна 5986 кишида вирус аниқланди ва жами беморлар сони 47021 нафарга етди. Айни вақтда уларнинг 5129 нафари соғайиб, уйига жавоб берилган, қолган беморларнинг 2655 нафари оғир аҳволда.

Вирус илк бор тарқалган Хитойда эса, расмий маълумотларга кўра, шу вақтгача вафот этганлар сони 3248 нафарни ташкил қилмоқда, сўнгги бир кунда 3 ўлим қайд этилди. Беморлар сони ўсиши ҳам жиддий пасайган - бир кунда 39 бемор, вирусдан зарарланганлар сони 80967 нафар, шундан 71150 киши тузалиб кетган. Айни вақтда бутун мамлакат бўйлаб 6569 бемор шифохоналарда қолмоқда, шундан 282 нафари Хубэйдан ташқаридаги вилоятларда.

Лекин айрим экспертлар, Хитойдан берилаётган расмий рақамларга ишончсизлик билан қарашмоқда.

Айни вақтда Европа давлатлари коронавирус тарқалиши олдини олиш мақсадида карантин муддатини узайтиришни режалаштирмоқда.

Италияда 14 кунлик мажбурий карантин 12 март куни бошланганди, аммо ҳукумат 25 мартдан кейин ҳам муддатни узайтирмоқчи. Амалда барча итальянлар уйларида қолади.

15 кунлик карантинни узайтириш ҳақида Франция ҳукумати ҳам айтмоқда. Францияда карантин чораларини бузганларни қўлга олиш ва жазолаш бошланди - 15 минг евролик жарима. 

Франция вирусдан энг кўп жабр чеккан давлатлардан бири бўлиб турибди - 10995 бемор, 372 қурбон.

Буюк Британия бош вазири Борис Жонсон коронавирусни енгиш учун 12 ҳафта талаб этилиши ва июнь ойи охирига бориб эпидемия сусая бошлаши мумкинлиги, лекин бунга ҳеч қандай кафолат йўқлигини айтиб ўтган.

Борис Жонсон / REUTERS

Бугундан мамлакатдаги барча ресторанлар, паблар, кинотеатрлар ва спорт заллари ёпилди. Ҳукумат 90дан ортиқ турдаги дори воситалари экспортини тақиқлади. Нафақага чиққан тиббиёт ходимларидан ишга қайтиш сўралди.

Британияда 20 март куни яна 40 киши вирус туфайли оламдан ўтган, жами қурбонлар сони 184 нафар. Мамлакатда вирус юқтириб олганлар сони 3269 нафарни ташкил этмоқда.

Европа етакчилари ҳозирча инқирозга қарши чоралар қачон сусайтирилиши мумкинлиги ҳақида гапиришмаяпти.

Европа Иттифоқида қатъий чегара назорати ўрнатилган. Иттифоққа аъзо бўлмаган давлатдан келган саёҳатчи чегарадан ўтказилмайди ва ортига қайтарилади. ЕИнинг 27 мамлакати ўз ҳудудига киришга 30 кунлик чеклов ўрнатган.

Испанияда сўнгги бир кунда яна 210 киши коронавирусдан вафот этди ва жами қурбонлар сони 1041 нафарга етди. Вирус юқтирганлар сони 2335 нафарга кўпайган ва жами ҳолатлар сони 20412тага етган. Беморларнинг 1588 нафари тўла соғайиб кетган.

Германия канцлери Ангела Меркель миллатга мурожаат қилди. «Вазият жиддий. Жиддий муносабатда бўлинг. Бирлашув давридан буён (1991 йил, Берлин девори қулаши), ҳатто Иккинчи жаҳон уруши давридан буён мамлакатимиз бундай оғир муаммога дуч келмаганди, бу кураш натижаси бизнинг бирдамлигимизга боғлиқ», деган у.

Германияда коронавирус тарқалишига қарши кураш чоралари Испания ва Италиядаги каби кескин эмас. Ҳукумат мактабларни ёпган, кўплаб компаниялар ишламаяпти.

Мамлакат аҳолиси кўчада ўзаро учрашиши ва вақтни биргаликда ўтказиши мумкин, аммо немис нашрларининг ёзишича, Меркелнинг мурожаати эҳтимолий мажбурий карантин арафасидаги сўнгги огоҳлантириш бўлиши мумкин.

Жума кунги маълумотларга кўра, Германияда вирусдан зарарланганлар сони 3474 нафарга ошиб, жами 18794 нафарга етган. Ўлим ҳолатлари сони 53 нафар (+9).

Бошқа давлатлар

  • Австрия 5 апрелга қадар Тироль провинциясини тўлиқ ёпди, бу ҳудуд мамлакатда вирус тарқалиши ўчоғи бўлди. Бу ерга фақат маҳаллий аҳоли вакиллари ва айрим ишчи-ходимлар, шунингдек, маҳсулотлар киритилиши мумкин;
  • Словенияда жума кунидан жамоат жойларида йиғилиш тақиқланди;
  • Португалия 15 кунлик фавқулодда ҳолат ҳақида эълон қилди, аммо бош вазир Антонио Коста бу чоралар яна бир неча ойга чўзилиши мумкинлигидан огоҳлантирди - қиролликда вирусдан зарарланганлар сони мингдан ошди;
  • Испания қироли Филипп IV телемурожаатида вирус миллатни енга олмаслиги, аксинча фуқароларни бирлаштириши ҳақида гапирди. Мадриддаги кексалар уйида 19 киши вафот этгач, жиддий текширувлар бошланган;
  • Норвегияда парламент аҳоли бандлиги ва соғлиқни сақлаш соҳасидаги вазият бўйича чоралар бўйича қонун лойиҳасини қабул қилди. Бу мамлакатда ҳам вазият оғирлашмоқда - вирус юқтирганлар сони 2 мингга яқинлашди;
  • Сербияда коронавируснинг илк қурбони қайд этилди, бу мамлакатда беморлар сони 135 нафар.

Бундан ташқари, Польшада эпидемия даври режими жорий этилди, Украинада Киевда ва яна икки областда фавқулодда ҳолат режими жорий қилинди, Грузия бутун дунё давлатлари билан авиақатновларни тўхтатди, Индонезия пойтахти Жакартада фавқулодда ҳолат эълон қилинди, Гаити, Кабо-Верде ва Мадагаскарда вирусдан зарарланишнинг илк ҳолатлари, Перуда вирусдан илк ўлим ҳолати қайд этилди, Буркина-Фасода таълим вазири вирус юқтириб олди, Саудия Арабистонида жамоат транспорти фаолияти тўхтатилди, бутун Аргентина бўйлаб карантин ҳолати жорий этилди, Бразилия ва Марокашда ҳам фавқулодда ҳолат режими жорий қилинди.

  • Сўнгги маълумотларга кўра, коронавирусга чалинган беморлар сони бутун дунёдаги 170дан ортиқ мамлакатда 268 мингдан ошиб кетди, уларнинг 90 мингдан ортиғи соғайган, 11187 киши вафот этган.
Мавзу
Коронавирус Ўзбекистонда
15 март куни Ўзбекистонда коронавирусга чалинган илк бемор аниқланди.
Барчаси
Top