21:17 / 21.03.2020
10327
Ўзбекистонда карантин вақтида интернет тезлиги, ортиқча юкланиш даражасининг олдини олиш бўйича ишлар қай аҳволда?

Бугун ахборот технологиялари ва коммуникацияларини ривожлантириш вазири ўринбосари Қаҳрамон Юлдашев иштирокида брифинг бўлиб ўтди.

Фото: Fotolia

Қаҳрамон Юлдашев аҳолининг асосий қисми уйда бўлиб турган айни кунларда интернет тезлиги, ўта юкланиш даражасининг олдини олиш бўйича ишлар, республиканинг олис туманларида интернет билан қамраб олиш ишлари тўғрисида маълумот берди.

“Халқ таълими вазирлиги ва Мактабгача таълим вазирлиги томонидан тайёрланаётган видеодарслардан бемалол фойдаланиш учун интернет провайдерлар ва мобиль алоқа операторлари томонидан жорий йилнинг 1 май кунига қадар eduportal.uz, kitob.uz, edumarket.uz, online-maktab.uz, talim.uzedu.uz, utube.uz, itschool.uz, coronavirus.uz веб-сайтларга киришни (доступ) бепул амалга оширилиши таъминланди”, деди у.

Вазир ўринбосарининг сўзларига кўра, карантин даврида интернет трафик, мобиль ва телефон алоқа трафиги ўзгаришлари доимий назоратга олинган. Юкланиш ўта юқори даражада ошиб кетадиган ҳолатларда амалга ошириладиган ишларнинг режалари тайёрланган.

“Яна шуни айтиш жоизки, интернет хизмати тезлиги фойдаланилаётган технология билан чамбарчас боғлиқдир. Яъни оптик толали алоқа линиялари орқали хизмат тақдим этилган ҳолларда компания юқори тезликларда - 100 Мбит/секундгача тезликда интернет хизматини кўрсатиш имконияти мавжуд. Шунингдек, абонентлар фойдаланаётган тариф режаси ҳам интернет тезлигига чамбарчас боғлиқ. Яъни 4 Мбит/сек тезликда интернет хизмати тақдим этиладиган тариф режасида ундан катта тезликда интернетдан фойдаланиш имкони мавжуд эмас”, деди у. 

Қаҳрамон Юлдашевнинг маълумот беришича, Ўзбекистонда коронавирус пандемияси бўйича эълон қилинган карантин режими вақтида мобил алоқа операторлар томонидан ўрнатилаётган таянч станциялари учун Ахборот технологиялари ва коммуникацияларини ривожлантириш вазирлиги томонидан база станцияларини ишга тушириш тартибини соддалаштириш, жумладан паралель лойиҳалаш учун рухсатномалар тақдим этилиши йўлга қўйилди. 

“Бугунги кунга келиб, ушбу соддалаштирилган тартиб бўйича 100 дан ортиқ база станциялар муддатидан аввал ишга туширилмоқда”, деди Юлдашев.

Мавзу
Коронавирус Ўзбекистонда
15 март куни Ўзбекистонда коронавирусга чалинган илк бемор аниқланди.
Барчаси
Top