Prezident hokimlarga karantin paytida barcha darajadagi majlisbozliklarni to‘xtatishni buyurdi

Kun.uz muxbiri xabar berishicha, prezident hududlar hokimlariga karantin paytida joylarda barcha darajadagi yig‘ilishlar va majlisbozliklarga chek qo‘yish talabini qo‘ygan.

Karantin davrida barcha tashkilotlarda masofaviy ish tizimiga o‘tilishi ma'lum qilingan.

Shuningdek, viloyat hokimlariga olis hududlardagi dorixonalarda zarur dori-darmonlar, savdo do‘konlarida muhim oziq-ovqat mahsulotlari yetkazib berilishini ta'minlash haqida topshiriq berilgan.

Prezident yig‘ilishda shifokorlar fidoyiligini yuqori baholar ekan, xalqimizdan ham ayni paytda ularning maslahat va tavsiyasiga, karantinda bo‘lish qoidalariga qat'iy rioya qilishlariga alohida to‘xtaldi.

«Bugun koronavirusga qarshi kurash olib borayotgan shifokorlarimizni jang maydonidagi jangchiga qiyoslayman. Ular o‘z sog‘lig‘ini xavf ostiga qo‘yib, fidoyilik ko‘rsatishmoqda. Shifokorlarimizga nafaqat hozir, balki bu sinovlardan keyin ham alohida ehtiromimizni bildiramiz», deya prezidentning so‘zlarini keltirmoqda Kun.uz muxbiri.

Yig‘ilishda 60 yoshdan oshganlar, homilador ayollar va uch yoshgacha farzandi bo‘lgan ishchi-xodimlarga ta'til berish lozimligi aytildi. 60 yoshdan oshganlar, surunkali xastaligi bo‘lganlarga zaruratsiz ko‘chaga chiqmaslik tavsiya etildi.

Yakka-yolg‘izlarga qarash uchun maxsus ko‘ngilli otryadlar tuziladi.