19:55 / 26.03.2020
63931

Koronavirus bilan kurashayotgan shifokorlarga 25 million so‘mdan oylik ustama to‘lanadi

Koronavirusga qarshi kurashishga jalb qilingan tibbiyot va sanitariya-epidemiologiya xizmati xodimlarini rag‘batlantirishga oid prezident qarori e'lon qilindi.

Qarorga asosan, koronavirus infeksiyasidan zararlangan bemorlar bilan muloqotga kirishadigan, zararlangan bemorlar joylashtirilgan obektlarda hamda koronavirus infeksiyasini aniqlash laboratoriyalarida faoliyat olib borayotgan qator toifa xodimlarga har 14 kunlik faoliyat davri uchun quyidagi miqdorlarda (soliqlardan tashqari) maxsus qo‘shimcha rag‘batlantirish to‘lovi belgilandi:

– vrachlar va vrach-laborantlarga 25 million so‘m;
– o‘rta tibbiyot xodimlariga, hamshira-laborantlarga 15 million so‘mdan;
– kichik tibbiyot xodimlariga 10 million so‘mdan;
– boshqa xodimlarga 5 million so‘mdan.

Koronavirus bilan kasallangan bemorlarni davolash paytida virusni yuqtirib olgan tibbiyot, sanitariya-epidemiologiya xizmati va boshqa xodimlarga bir martalik to‘lov miqdori 100 million so‘m etib belgilandi.

Shuningdek, bemorlar bilan ishlagan vaqtida koronavirus infeksiyasini yuqtirishi natijasida og‘ir ahvolga tushgan va sog‘lig‘i tiklanmagan taqdirda tibbiyot, sanitariya-epidemiologiya xizmati va boshqa xodimlarga yoki ularning oila a'zolariga 250 million so‘m to‘lab beriladi.

Ma'lumot uchun, virus yuqtirib olgani aniqlangan 65 nafar bemor orasida 11 nafar tibbiyot xodimi ham bor.

Mavzu
Koronavirus O‘zbekistonda
15 mart kuni O‘zbekistonda koronavirusga chalingan ilk bemor aniqlandi.
Barchasi
Top