Koronavirus: Dunyo mamlakatlari ko‘chalar va uylarni qanday dezinfeksiya qilmoqda?

Bugungi kunda koronavirus tarqalishining oldini olish maqsadida ko‘chalar va jamoat joylari dezinfeksiya qilinyapti. Ko‘plab shaharlarda maxsus brigadalar buning uchun xlor ohagi va suv aralashmasidan foydalanishyapti. Jahon Sog‘liqni saqlash tashkilotining ma'lum qilishicha, bu kabi aralashmalarning sepilishi burun, ko‘z, og‘iz shilliq qavatiga zarar keltiradi.

Xlor ohagi koronavirusga qarshi kurashda haqiqatan ham samarali va yuzalarni samarali tozalaydi. Biroq xlor inson shilliq qavatlariga zarar yetkazishi, terini kuydirishi mumkin. Aynan shuning uchun dezinfeksiya o‘tkazish vaqtida maxsus kiyimda bo‘lish, kimyoviy vositalar bilan ishlash qoidalariga rioya etish kerak. Biroq dezinfeksiyadan keyin shaxsiy himoya vositalarisiz yuzalarni ushlash mumkin emas. Xonalar dezinfeksiya qilinayotganda ham u yerdan chiqib turish kerak. Xlor bilan dezinfeksiya qilinganidan keyin barcha yuzalarni oddiy suv bilan yuviladi. Shundan keyin ularga qo‘l bilan tegish mumkin.

Xitoyda jumladan uning Shanxay, Pekin va Uhan shaharlarida ko‘chalar va jamoat joylarini dezinfeksiya qilishga sanitar brigadalari jalb etilgan. Xlorli ohak va suv aralashmasi to‘ldirilgan yuk mashinalaridan tashqari mustaqil harakatlanadigan skuterlarda himoya niqobini taqqan ishchilar dezinfeksiya ishlarini amalga oshiradi. Xitoydagi epidemiya tarqalgan ilk kunlardayoq ommaviy axborot vositalarida havoni dezinfeksiya qiluvchi vositalarning sepilishi haqida xabar berilgandi. Ko‘plab suratlarda maxsus brigadalar ballonlardagi dezinfeksiya vositalarini sepishganini ko‘rish mumkin.

Janubiy Koreyada yangi koronavirus qayd etilgan bemorlar orasidagi o‘lim holatlari dunyodagi eng past ko‘rsatkichni (9478 holatga 144 o‘limm) tashkil etmoqda. Ekspertlar aholini ommaviy testdan o‘tkazish, fuqarolarning karantin talablariga rioya etishi, shuningdek, ommaviy joylar va shahar ko‘chalarining dezinfeksiya qilinishi CoVID-19 bilan samarali kurashishga hissa qo‘shayotganini aytishmoqda.

Koronavirusdan eng ko‘p aziyat chekkan va bugungi kunda uning episentriga aylangan Italiyada o‘lim ko‘rsatkichi 7 yoki hatto 8 foizni tashkil etmoqda. Hozirda mamlakatda qat'iy karantin talablari joriy etilgan va oziq-ovqat mahsulotlari xarid qilish uchun do‘kon hamda dorixonaga chiqish kabi sabablar bo‘lmasa, ko‘chaga chiqish taqiqlangan. Italiyada dezinfeksiya ishlari muntazam olib borilmoqda. Jamoat transporti, savdo markazlari, restoranlar, fitnes-klub va boshqa jamoat muassasalari faoliyati to‘xtatilgan.

Eronda koronavirusdan zararlanish holatlari 35 mingdan ortiq. Ko‘p vaqt davomida zararlanganlar soni bo‘yicha Eron Italiyadan keyin ikkinchi o‘rinni egallab turgan edi. So‘nggi kunlarda AQSh, Ispaniya va Germaniyada kasallanganlar sonida keskin o‘sish kuzatildi va Eron ortda qoldirildi. Bunga birinchi navbatda karantin choralari joriy etilgani, ommaviy tadbirlar o‘tkazilishi taqiqlanishi, odamlar ko‘p to‘planadigan joylar, jumladan, masjidlarning ham dezinfeksiya qilinishi katta hissa qo‘shdi. Qayd etish lozimki, Eron dezinfeksiyaga mas'uliyat bilan yondashmoqda. Ayrim kadrlarda maxsus brigadalar hatto avtomobillarga ham dezinfeksiya aralashmalarini sepishayotganini ko‘rish mumkin.

28 mart holatiga ko‘ra, O‘zbekistonda koronavirusga chalinganlar soni 100dan oshdi, ikki kishi vafot etgan.