O‘zbekistondagi tibbiyot oliygohlari ilmiy darajalar berish huquqiga ega bo‘lmoqda

O‘zbekiston Respublikasi prezidentining 2020 yil 7 apreldagi «Tibbiy-sanitariya sohasida kadrlarni tayyorlash va uzluksiz kasbiy rivojlantirishning mutlaqo yangi tizimini joriy etish chora-tadbirlari to‘g‘risida»gi PQ–4666 sonli qarori imzolandi.

Prezident O‘zbekiston Respublikasi Vazirlar Mahkamasi huzuridagi Oliy attestatsiya komissiyasi, Sog‘liqni saqlash vazirligi hamda Oliy va o‘rta maxsus ta'lim vazirligining 2020 yil 1 sentyabrdan Nukus, Andijon, Buxoro, Samarqand, Urganch va Farg‘ona shaharlarida joylashgan tibbiyot oliy ta'lim muassasalarida belgilangan tartibda falsafa doktori (PhD) va fan doktori (DSc) ilmiy darajalarini beruvchi ilmiy kengashlar tashkil etish to‘g‘risidagi taklifini ma'qullagan.

Shuningdek, Sog‘liqni saqlash vazirligining quyidagi takliflariga ham rozilik berilgan:

• Toshkent vrachlar malakasini oshirish institutini Tibbiyot xodimlarining kasbiy malakasini rivojlantirish markazi etib qayta tashkil etish;
• Toshkent shahridagi 1-son Respublika klinik shifoxonasi negizida Markazning ko‘p tarmoqli klinikasini tuzish;
• tibbiyot oliy ta'lim muassasalari mavjud bo‘lmagan hududlarda (Jizzax, Qashqadaryo, Navoiy, Namangan va Sirdaryo viloyatlarida) hududiy ko‘p tarmoqli tibbiyot markazlarida Markaz filiallarini ochish;
• Markazda 2021 yilgi O‘zbekiston Respublikasining ijtimoiy va ishlab chiqarish infratuzilmasini rivojlantirish dasturi mablag‘lari hisobidan xalqaro standartlarga javob beradigan o‘quv-simulyatsion markazini tashkil qilish.

Prezident qarori bilan O‘zbekiston Respublikasi Sog‘liqni saqlash vazirligi huzuridagi Tibbiyot xodimlarining kasbiy malakasini rivojlantirish markazining tuzilmasi tasdiqlangan.

Tibbiy-sanitariya va farmatsevtika kadrlarining uzluksiz kasbiy malakasini oshirish tizimida 2020 yil 1 sentyabrdan boshlab akkreditatsiyadan o‘tmasdan, SSV tomonidan har yili tasdiqlanadigan o‘quv dasturlari asosida o‘qitish huquqi quyidagi muassasa va tashkilotlarga taqdim etiladi:

• O‘zbekiston Respublikasining Davlat budjeti mablag‘lari hisobidan va pullik asosda – respublika ixtisoslashtirilgan ilmiy-amaliy tibbiyot markazlari, tibbiyot va farmatsevtika sohasidagi ilmiy-tadqiqot institutlari va hududiy ko‘p tarmoqli tibbiyot markazlari;
• pullik asosda – nodavlat tibbiyot oliy ta'lim muassasalari hamda tegishli tibbiy-sanitariya mutaxassisliklar bo‘yicha o‘quv-simulyatsion markazi (shu jumladan mobil o‘quv-simulyatsion markaz) va ilmiy darajaga ega mutaxassislari mavjud bo‘lgan xususiy tibbiyot tashkilotlari.

Tuman (shahar) tibbiyot birlashmalari, shu jumladan birlamchi tibbiyot-sanitariya yordami muassasalari xodimlarining uzluksiz kasbiy malakasini oshirishi mazkur bandda belgilangan muassasa va tashkilotlar tomonidan joylarda tashkil etiladigan sayyor sikllar va masofadan turib o‘qitish asosida amalga oshirilishi belgilangan.

Sog‘liqni saqlash vazirligi uzluksiz kasbiy malaka oshirish tizimida tibbiyot xodimlarini o‘qitish bilan shug‘ullanadigan tashkilotlarga yuqori malakali xorijiy mutaxassislarni jalb qilgan holda maxsus o‘quv kurslarini tashkil qilishda yaqindan ko‘maklashadi.

Belgilanmoqdaki, 2021 yil 1 yanvardan boshlab:

• shifokorlar uchun har 5 yilda malaka toifasini olish bo‘yicha majburiy attestatsiyadan o‘tish tartibi kiritiladi hamda ularga qulaylik yaratish va shaffof o‘tkazilishini ta'minlash uchun attestatsiyani onlayn tartibda audio va videokuzatuv ostida tashkil etish tizimi joriy etiladi;
• birlamchi tibbiy-sanitariya yordami muassasalari tibbiyot xodimlarini attestatsiyadan o‘tkazish uchun to‘lov bekor qilinadi.

Tibbiy-sanitariya va farmatsevtika kadrlari uchun malaka oshirishni nazarda tutuvchi uzluksiz kasbiy ta'lim tizimini joriy etgan tibbiyot oliy ta'lim muassasalari (shu jumladan nodavlat tibbiyot oliy ta'lim muassasalari), respublika ixtisoslashtirilgan ilmiy-amaliy tibbiyot markazlari va ularning filiallari, ilmiy-tadqiqot institutlari, hududiy ko‘p tarmoqli tibbiyot markazlari va nodavlat tibbiyot tashkilotlariga malaka oshirishdan muvaffaqiyatli o‘tgan mutaxassislarga o‘tilgan o‘qish kreditlari ko‘rsatilgan holda Sog‘liqni saqlash vazirligi tomonidan belgilanadigan namunadagi sertifikat rasmiylashtirish huquqi beriladi.