Koronavirus: AQShda qurbonlar soni 20 mingdan ortiq, Ispaniyada o‘limlar soni yana osha boshladi

So‘nggi ma'lumotlarga ko‘ra, AQShda Covid-19 oqibatida vafot etganlarning jami soni 21,4 mingdan oshdi, jami zararlanish holatlari 535 mingdan ortiqni tashkil etmoqda. Bir kun oldin AQSh bir kunda ikki mingdan ortiq bemor vafot etgan dunyodagi ilk davlat bo‘lgandi.

12 aprel holatiga ko‘ra, butun dunyoda Covid-19’dan zararlanish bilan bog‘liq jami holatlar soni 1,8 milliondan oshgan, 112 mingga yaqin kishi vafot etgan, 416 mingdan ortiq bemor sog‘aygan.

Nyu-York shtati gubernatori Endryu Kuomoning so‘zlariga ko‘ra shtatdagi o‘lim darajasi endilikda avvalgidek keskin sur'atlarda o‘smayapti. So‘nggi bir kunda Nyu-Yorkda koronavirus yana 783 kishi hayotiga zomin bo‘ldi, bu so‘nggi kunlardagi statistikadan ko‘p farq qilmaydi.

«Bu o‘limlar soni bo‘yicha rekord ko‘rsatkich emas. Ko‘rib turganingizdek, o‘limlar soni barqarorlashmoqda, ammo bu barqarorlik juda dahshatli raqamlarda ifodalanmoqda», degan Kuomo.

Shanba kuni kechqurun Amerikaning barcha shtatlarida koronavirus pandemiyasi tufayli favqulodda holat e'lon qilindi. Shu haftada Nyu-Yorkda koronavirus qurbonlari juda ko‘pligi tufayli marhumlar birodarlik qabristoniga dafn etilayotgani xabar qilingandi.

Pandemiya tufayli butun mamlakat bo‘ylab ijtimoiy munosabatlarda qat'iy cheklovlar o‘rnatilgan, prezident Donald Tramp bunday choralar kamida 30 aprelgacha amalda bo‘lishini ma'lum qilgan. Ko‘plab sanoat korxonalari ishlamay qolishi va mamlakatdagi iqtisodiy vaziyat og‘irlashishi tufayli bir necha hafta ichida kamida 16 million amerikalik ishini yo‘qotdi.

«Eng muhim qaror»
Juma kuni prezident Tramp keyingi haftada yangi kengash tuzilishi, uning tarkibidan tibbiy xodimlari va biznes vakillari o‘rin olishi haqida aytdi: bu organ unga bu cheklovlarni qachon yumshatish bo‘yicha qaror qabul qilishda yordam berishi kerak. AQSh prezidenti «bu hayotidagi eng muhim qaror bo‘lishi» haqida aytib o‘tdi.

Bu vaqtda AQSh kongressi jabrlangan kompaniyalarga yordam berish choralarini muhokama qilmoqda. Demokratlar kichik biznesni qo‘llab-quvvatlash va shifoxonalar hamda mahalliy boshqaruv organlarini moliyalashtirish uchun qo‘shimcha 250 milliard dollar ajratishni taklif qilmoqda. Ammo shanba kuni taniqli respublikachilar - Senatdagi respublikachilar yetakchisi Mitch Makkonnell va Vakillar palatasidagi respublikachilar yetakchisi Kevin Makkarti bu g‘oyaga qarshi chiqishdi.

New York Times yakshanba kuni e'lon qilgan materialda aytilishicha, Amerika maxsus xizmatlari va tibbiyot ekspertlari Trampga yanvar oyi oxiridayoq koronavirus xavfi haqida hisobot bergan, ammo ularning ogohlantiruviga e'tibor qaratilmagan.

Ispaniya: plyajlar yopiqligicha qoladi
Yakshanba kuni holatiga ko‘ra, Ispaniyada koronavirusdan yana 619 kishi halok bo‘ldi, bu shanba kungi ko‘rsatkichdan (510 o‘lim) ko‘proqdir.

Shanba kungi o‘lim ko‘rsatkichi mamlakatda so‘nggi uch haftadagi eng past ko‘rsatkich bo‘lgandi. Ammo Ispaniya hukumati o‘lim holatlari haqidagi ma'lumotlar dam olish kunlaridagi ta'til tufayli ma'lumot yetkazilishi kechikishi bilan bog‘liq bo‘lishi mumkinligini bildirgan.

Ispaniyada so‘nggi bir kunda yana 5 mingga yaqin kishi virusdan zararlangani aniqlandi, jami holatlar soni 166 mingdan oshdi, bu borada faqat AQSh oldinda.

Ispaniya turizm ishlari vaziri Reyyes Maroto 14 mart kuni joriy etilgan ijtimoiy masofalanish choralari qat'iy karantin yakunlanganidan keyin ham amalda bo‘lishi haqida ma'lum qildi. Shundan kelib chiqqan holda plyajlar ham yopiqligicha qoladi, mamlakatga xorijliklar kirishiga taqiq ham bekor qilinmaydi.

El Pais nashriga bergan intervyusida Reyyes shunday degan: «Vaksina paydo bo‘lmaguncha, hech narsa avvalgiday bo‘lmaydi. Xavfsiz masofani ta'minlash uchun yig‘ilishlarni cheklashga to‘g‘ri keladi». U mamlakat chegaralari qachon ochilishini ayta olmasligini, bu inqirozli holat qanday rivojlanishiga bog‘liqligini bildirgan.

Ispaniya - mamlakatda sayyohlar tashrifi bo‘yicha Fransiyadan keyingi ikkinchi o‘rinda turadi, turistik sektorning mamlakat iqtisodiyotidagi ulushi 12 foiz atrofida.

Bundan tashqari
Yevropada koronavirusdan vafot etganlar soni bo‘yicha hamon Italiya yetakchilik qilmoqda - bu yerda 19,9 ming o‘lim holati qayd etilgan. Mamlakatda Covid-19’dan zararlanish tashxisi 156,3 ming kishiga qo‘yilgan.

Fransiya (132,6 ming holat va 14,4 ming o‘lim) shanba kuni kunlik o‘lim holatlari soni pasaygani haqida ma'lum qildi, shanba kuni 635 o‘lim qayd etilgandi, yakshanba kuni qurbonlar soni 561 nafarga oshdi. «Biz juda yuqori platoga chiqdik, ammo bu epidemiya hamon faollikni saqlab qolmoqda», degan Fransiya sog‘liqni saqlash boshqarmasi Jyerom Salomon.