Rossiyadagi mehnat muhojirlari yotoqxonasida koronavirus tarqaldi, ular orasida o‘zbeklar ham bo‘lishi mumkin

Yotoqxonada shahar qurilish obektlarida ishlayotgan mehnat muhojirlari yashagan, ularning millati kimligi haqida rasmiy xabar berilmayapti. 

Ammo, yotoqxona ichidan olingan fotosuratlarda eshikka yopishtirilgan e'lonlar ham bor. Ular o‘zbek tilida yozilganini inobatga olsak, muhojirlar ichida vatandoshlarimiz ham bo‘lishi mumkin.

Noqonuniy deb aytilayotgan yotoqxona 11 aprel kuni Rospotrebnadzor, Tergov qo‘mitasi va politsiya hamkorligida o‘tkazilgan reydda aniqlangan edi. Reyd davomida sanitar shifokorlar muhojirlar orasida koronavirus alomatlari: yuqori harorat va yo‘tal borligini qayd qilishgandi.

Yangi ma'lumotlarga ko‘ra, yotoqxonada yashagan 123 nafar mehnat muhojirida koronavirus borligi aniqlangan. Bu Leningrad viloyati bo‘yicha koronavirus bilan xastalanganlarning 40 foizini tashkil qiladi. Mehnat muhojirlarining ko‘pchiligida kasallik yengil shaklda o‘tayotgani aytilmoqda. Leningrad viloyati gubernatori muhojirlar yotoqxonasidagi koronavirus epidemiyasi xurujini «infeksiya bombasi» deb atadi.

Hozirgi vaqtda Rosgvardiya xodimlari va politsiya yotoqxonani tunu-kun uzluksiz ravishda qo‘riqlamoqda. Ular hech kimni tashqariga chiqarmayapti. Kasallanganlar shifoxonaga yotqizilmayapti. Ular uchun yotoqxona hududida 88 o‘rindiqqa mo‘ljallangan palatkali gospital tashkil qilingan.

Vsevolojsk shifoxonasi bosh vrachi o‘rinbosari Alla Shkolyarenko so‘zlariga ko‘ra, kasallanganlar uchta guruhga ajratilgan – koronavirus tasdiqlanganlar, tasdiqlanmaganlar, ammo shamollash alomati borlar va kasallik alomatlariga ega bo‘lmaganlar. Ular alohida palatkalarga joylashtirilgan.

Rossiya Tergov qo‘mitasi voqea yuzasidan sanitariya-epidemiologiya qoidalarini buzish holatlari bo‘yicha jinoyat ishini ochgan. Prokuratura xabariga ko‘ra, binoni ijaraga olgan shaxs sanitariya me'yorlariga amal qilishni ta'minlash bo‘yicha hech qanday chora ko‘rmagan.